Shillong, Iaiong 24: Ka Fifteenth Finance Commission jong ka sorkar India kan wan jngoh ia ka Assam, ka jylla kaba long ka khyrdop sha ka thain shatei lammihngi jong ka ri naduh 25- 27 tarik Iaiong, 2018. Kane ka kynhun hapoh ka jingialam jong u Chairman N.K.Singh, lem bad ki dkhot ba kynthup ia u Shaktikanta Das, Dr. Anoop Singh, Dr. Ashok Lahiri, Dr. Ramesh Chand bad Secretary Arvind Mehta ryngkat bad kiwei kiwei ki heh ophisar kin lum jingtip halor ka jinglong jingman ka pisa tyngka ha ka jylla Assam, ki jingeh ba iadei bad ka ioh ka kot ka imlang sahlang bad ban pynsngewthuh ia ki jingpyrshang jong ka sorkar jylla ban weng ia kine ki jingeh.
Ka Assam ha kine ki sngi, ka la pynpaw ia ka jingkiew bad ka roi ka par ha ka ioh ka kot bad ka imlang sahlang wat hapdeng ki jingeh. Hynrei, ki don ki kabu bad ki lad ba kongsan ban nang kham kyntiew sted shuh shuh ha ka koit ka khiah, ka pule puthi bad ki jingjop ha ka ioh ka kot ha ka jylla. Haba don ka jingiasah lang jong ki jaitbynriew bapher bapher ki mih ki jingiakhleh ha ki riti ki dustur bad ki rukom im ka wanrah ki jingeh kiba ha rukom haba pyrshang ban wanrah ia ka roi ka par. Watla ka don ka jingkiew ba la iohi ha kine ki por ba la leit, ka donkam ban ialeh pyrshah ia ki jingeh ba sah mynta la bun bun snem.
Ki mat ba kongsan ba kane ka commission kan khmih bniah ha kane kajingwan b alai sngi sha ka jylla Assam kan long ha ka imlang sahlang bad ka ioh ka kot naduh 2016 -2017, halor ka ioh ka kot jong ka jylla kadei na ka rep ka riang. Katkum ka Census 2011, kumba 50% ki briew ki shaniah ha ka rep ka riang. Watla ka jylla ka long kaba riewspah ha ka umphniang bad kiwei kiwei ki jingdon jingem jong ka mariang, ki karkhana bad jingkyntiew ia ka thain ka dang duna.
Watla ka service sector ka la long ka bynta ba kongsan ha ka ioh ka kot jong ka jylla ha ki por ba la leit.Ka Infant Mortality Rate (IMR) ne ka jingiap ki khunlung ha ka por kha (47 per 1,000 live birth) ka kiew bha haba ianujor bad ka average haba khein kyllum ha baroh kawei ka ri kaba long (37 per 1,000 live births).Ka Maternal Mortality Rate ne ka jingiap ka kmie ha ka por kha khun ka kiew bha ban ia ka National Average.
Ka jingkhmih lynti ban im haduh 64.7 snem ka kham duna ban ia ka all India average kaba long 68.3 snem,Ka jingdon kiba la nang la stad ha Assam kalong 72.2 per cent pyrshah ia ka percentage ha ka ri baroh kawei kaba long 73.Ka jingkiew ka jingbun briew kalong (16.93 per cent) ha ka jylla kaba duna haba ianujor ha ka ri baroh kawei (17.64 per cent).Ka ioh ka kot jong ka jylla Assam kalong 67,620 kaba duna haba ianujor bad average ha ka ri baroh kawei kaba long 1,03,870.
Yn wad ka Commission ia ki lad ki lynti ban pyniar ia ka ioh ka kot jong ka Assam.Ka Commission ka la ithuh ia ki bynta ba kyrpang jong ka Assam bad watla la iohi ia ka jingkiew ha kine ki por ba la leit, kan nang hap ban ialeh tyngeh ha ka roi ka par ban ia ryngkat bad ka ri baroh kawei khamtam ha kaba iadei bad ka ioh ka kot. Ka long ka bynta ba sngewkhia ba ka ioh ka kot jong ka jylla ka duna bha haba ianujor bad ka ri baroh kawei kaba la duna lypa ban ia kiwei ki iew ba dang sdang. Kumta ka Commission, kan wad ki lad ki lynti kiei ba dei ban leh bad kiwei kiwei ki jingkylla ba donkam da kaba pyniar ia ki jingdon jingem ba ka jylla ka don bad kumjuh ruh ban pyntreikam bha ia ki.
Ka Finance Commission ka donkam ban bishar bniah bad ki lad ki lynti ba lah ban wanrah ia ka roi ka par bad ka jingkiew ha ka ioh ka kot ha Assam. Kane kan long da kaba pynlong ia ki jingiaphylliew jingmut bapher bapher bad ki jingialang ba ka Commission ka la pynbeit ban pynlong ha Assam ha kane ka jingwan jngoh jong ka ia ka jylla.
Ka Assam kadei ka jylla kaba ar ba ka Fifteenth Finance Commission kan leit jngoh, kaba nyngkong kadei ha Arunachal Pradesh. Kalong ka bynta ba kongsan ha ka agenda jong ka Finance Commission ban leit jngoh ia ki jylla bapher bapher, ban sngewthuh ia ki jingdonkam jong ki ha ka roi ka par bad ki jingdon jingem ba ki don, bad hadien ki jinglum jingtip baroh, ki don ki jingai jingmut bad ka jingai ia ka kaiphod.
Ka Commission kan pynlong jingialang bad u Chief Minister, ki Minister bad kiwei kiwei ki ophisar jong ka jylla. Yn pynkhreh ruh halor ki jingbei tyngka jong ka sorkar jylla. ka Commission kan iakynduh ruh ia ki nongialam seng sain pyrthei bapher bapher, ki dkhot jong ki Autonomous Council, ki dkhot jong ka Trade and Industry ba kynthup ia ka Chambers of Commerce/Assam branch of FICCI, Assam Branch of Indian Tea Association, bad kiwei kiwei kiba ia don bynta ban sngewthuh ia ki lad ki kabu bad ki jingeh ha ka jylla. kan don ruh ka jingiamir jingmut bad ki nongpyniaid shnong bad ki Panchayati Raj.
