Shillong, Jymmang 10: Ka rynsan ka la long kaba la pynkhreh na ka bynta ban pynlong ia ka phainal jong ka lympung bah ialehkai bna nam tam hangne ha ka jylla, ka Shillong Premier League 2023, ka Shillong Sports Association, ha kaba ka Mawlai Sports Club kan mih madan ban aireng pyrshah ia ka Rangdajied United FC, kaba la buh ban long lashai ka sngi ka 11 tarik u Jymmang 2024, ha SSA Stadium, First Ground, Polo, ha ka por 3 baje nohphai sngi.
Shi sngi shwa jong kane ka jingialehkai ia ka phainal, la ioh ia ka lad ban iakren bad ki nong ia kit ia bah ia kine ki artylli ki klob katta u bah Eskial S Mon ba dei u Jt Secretary bad u Jerry A Sutnga Asst Coach ka Mawlai Sports Club bad kumjuh u Aibanjop Shadap Head Coach ka Rangdajied United FC.
Haba phai sha ka Mawlai SC hapoh ka jingiam u bah Hering Shangpliang, ka don ka khubor kaba lam pynkyndeh ia ka mynsiem ki paid nongkyrshan hadien ba ki jkong u Eskial bad Jerry ki pynpaw ba don lai n gut ki nongialehkai kiba kham kynsai ha ka kynhun kiba don hapdeng ka jingartatien ban lah ban don ha ka First XI namar ba ki don hapdeng ka jingshitom.
Kine ki lai ngut ki kynthup ia u Remark Kharmalki u bym shim la lah ban ialehkai jan baroh shi samoi ialehkai ba mynta, bud pat sa u Donlad Diengdoh bad u Raikutshisha Buam.
Hynrei wat la katta kum ki nongiakit ia bah ia ka klob, u Eskial bad Jerry ki pynpaw ba kane kan nym da don than ka jingktah ia ka kynhun hi baroh kawei, katno tam lei lei hadien ba ki player ki la lah ban pynpaw ia ka jinglong kaba la ih bad tbit bha ha ka liang ka rukom ialehkai ka jong ki bad ka nuksa jong kane ka paw tyngkrein mynban ki la iakhu pyrshah ia ka Langsning FC ha ka semifinals.
Katba u Aibanjop Shadap Head Coach ka Rangdajied United FC,u pynpaw ba kum ka kynhun ka biang lut baroh ki player ki jong ka naka bynta ban iakhun ia ka phainal kaban long lashai ka sngi, ha kaba ym don wat tang uwei ruh ban ong ba un ud pang ne shitom, kane hi ka long ka dak jong ka jingkyrmen ia kane kawei ka klob, kaba wat la ka dei ka lahduh ha ka jylla, hynrei ka thrang bad ka sliang dik dik ka mynsiem naka bynta ban ioh ban piam k ha la ki jong ki ksang kti ia ka trophy jong ka nam lahduh ka SPL.
Ban shu kyrtiang dien biang sha kane ka samoi ialehkai kaba mynta u snem ia ka lynti iaid ka jong kine ki ar kynhun, haduh ba kut jong ka round robin ka RUFC ka la lah ba kan ioh khur 18 point na ki 7 sien iakhun katba ka Mawlai SC ka la ioh ba kan khur 16 point, bad ha ka por ba iakhun ia ka semifinal ka RUFC ka la lah ba kan pynliem da 1-0 ia ka Shillong Lajong FC, katba ka Mawlai SC ka la jop da 2-1 ia ka Langsning.
