Shillong, Rumphang 16: Ka jingialang jong ka EC khleh khawlang hapoh jong ka KHADC ia ka
ba la tip kum ka People Democratic Forum (PDF) kaba la long mynta ka sngi kala shim ia ka rai ba ia ka kaiphot halor ka jingthohkit halor ka jingkynnoh ba kala don ka jingiapyndon kam bakla ia ka pisa jong ka Council na ka Professional Tax yn sa wan rah hapoh ka iing dorbar kaban sdang ha ka 20 tarik mynta u bnai.
U Bah PN Syiem CEM jong ka KHADC haba kren ha ki nongthoh khubor u la ong ba ia kane ka rai ban wan rah hapoh ka iing dorbar ia ka jinglap jong ka kynhun tohkit la shim ha ka jingialang jong ka PDF mynta ka sngi.
Halor ka jingpan jingpynshai jong ka UDP halor ki khyndai tylli ki mat, u CEM u la ong ba ia kine ki jingpan jingpynshai baroh yn sa phah da ka jingthoh sha u nngialam jong ka Parliamentary Party jong ka UDP u Bah Teinwell Dkhar ba dia kane ka juab la phah mynta ka miet hi.
Kaba sngewlyngoh ka long ba ka UDP ka dei kawei na ki party kiba don hapoh jong ka PDF kaba ia trei lang hapoh jong kane ka EC kaba la ialam da u Bah PN Syiem kum u CEM.
Haba kren ha ki nongthoh khubor na ka liang jong u Bah HS Shylla MDC jong ka UDP u la ong ba ia kane ka jingjubab jong u CEM kin sa rah sha ka Sub Committee jong ka UDP bad ia kane kin sa ia kren la shai ka sngi hapoh jong ka Party. Ia kaei kaba kin sa rai kin pyntip.
Haba ia dei bad ka Conference Hall kaba la shna thymmai hapoh jong ka KHADC u Bah Shylla u ong ba ka jinglut jong kane ka Hall ka la kot sha ka T.45 lak bad u la kynnoh ba kane ka jingpynlut ka dei ka jingiatuh u la kynnoh.
