Shillong, Jylliew 05: Ka Ophis jong ka Khasi Hills Autonomous District Council (KHADC) mynnin ka janmiet kala jied ia u Aiban N Syiem kum u Acting Syiem ba thymmai jong ka Hima Bhowal na ka bynta ban pyniaid shipor ia ka synshar ka khadar hapoh ka Hima.
Ka jingshah jied ia u Aiban kum u Acting Syiem jong ka Hima Bhowal ka dei hadien ka jingshah weng noh jong u Bah Kynsaiborlang N Syiem na ka kam Acting Syiem ha ka Executive Committee jong ka KHADC.
Katkum ka Sanad ba la aiti da u Bah KP Pangniang uba dei u Exevutive Member i/c Elaka Aministration kaba la phah mynnin ka 4 tarik ka ophis jong ka KHADC, kala thung ia u Bah Aiban N Syiem kum u Acting Syiem ba thymmai jong ka Hima Bhowal na ka bynta ban pyniaid shipor ia ka synshar ka khadar hapoh ka Hima.
Katei ka sanad kala bthah ruh ia u Bah Aiban ba un pyniaid ia ka synshar ryngkat bad ka Executive Dorbar ba kan thung ia ki Myntri jong ki shnong bapher bapher da kaba yn jied da ka Dorbar bad ba phin khot kyrkieh na ka bynta kane bad phah ia ki kyrteng jong kita ki dkhot sha ka Executive Committee ba kan mynjur ia ki.
La kdew ruh ba yn dei ban pyniaid ia ka jingsynshar jong ka Elaka katkum ka Aiñ ne Rules kiba ka District Council ka lah ban pynjari ne ka ban dang pynjari na ka por sha ka por, bad haba ym pat don kiba kum kita phin sngewbha ban pyniaid katkum ka riti dustur kiba ju don ha ka Elaka.
U Bah Aiban u la ioh pdiang ia kane ka Sanad hynnin ka sngi bad kane ka sanad kan trei kam noh mardor naduh kane ka tarik haduh ban da ai hukum da kumwei pat.
Haba ia kren bad ki nongthoh khubor u Bah Aiban N Syiem ha kaba nyngkong eh u la ai ia ka burom sha ka ophis jong ka KHADC kumjuh ruh ia ki Kur, ki paidbah jong ka Hima u la ong ba yn ai ka jingsynshar kaba khuid bad kaba suba khlem da shah liang iano iano ruh naka bynta ban pyniaid beit pyniaid ryntih ia ka Hima.
U bah Aiban u la pyntip ruh ba la thung ia u Bah Tamdor Risaw kum u Secretary ba shi por jong ka Hima na ka bynta ban pyniaid beit pyniaid ryntih ia ki kam bad ha kajuh ka por u la pyntip ruh ba yn khot ia ka dorbar ha ka 7 tarik mynta u bnai bad la kyntu ia baroh ki Rangbah Shnong ba kin ia poi ryntih lang khnang ban lah ban pynithuh ia ki.
U Bah Kynsaiborlang N Syiem uba dei u Acting Syiem barim jong ka Hima Bhowal u la ong g ka Council ha ka 23 tarik jong u bnai ba la dep kala phah ia ka shithi ban weng noh ia u kum u Acting Syiem bad ban synshar Administrator lane ban synshar noh hi da ka KHADC, hynrei tang ha ka sngi kaba bud pat na ka ka council kata ha ka 24 tarik kala wan ban shim noh ia kata ka
U bah Kynsai u la ong ruh ba katba ka District Council ka dang don ha ka lynti na ka bynta ban pynlong ia ka election ban jied ia u Syiem ba pura jong ka Hima Bhowal kyndit kyndit hapdeng jong ka jingpynkhreh ia ka election ka weng noh ia nga kum u Acting Syiem jong ka Hima ha ka 4 tarik mynta u bnai.
“Kane ka jingweng jubor ka long bym don nongrim namar ba ka Hima kala don ia la ka jong ka Act ia kaba la ioh ruh ia ka jingmynjur da u Governor ha u snem 2008 bad kane ka jingweng jong ka council kam long kat kum ka Act jong ka Hima bad la shu ammend jubor khlem ka da mynjur da ka dorbar jong ka Council lane khlem da ioh ia ka jingmynjur na u Governor” la ong u Bah Kynsai.
Bah Kynsai u la ong biang ba kane ka jing ammend khlem da pyntip ia ka Hima bad kumjuh ruh ia ka tnad District Council Affairs (DCA) bad khlem da ioh ia ka jingmynjur da u Governor bad lyngba kane ka jingleh lehse ka lah ban don eiei sha lyndet.(SP News)
