Jowai, Jylliew 29: Ka KSU Jaintia Hills District Unit ka la byrngem ba kum ka seng ka la long kaba la pynkhreh lada ka Sorkar MUA – II hapoh ka jingïalam jong u Dr. Mukul Sangma ka thom da ka bor ban shna ïa ka lyntri rel ha ka jylla, kumjuh ruh lada kam pat pyllait iaki nongialam KSU.
“Ngi lah long kiba lah khreh ban mih shakhmat ban iakhun pyrshah bad ka Sorkar lada ka Sorkar ka thom da ka Bor ban shna iaka Lynti rel,kumjuh katba kam pat pyllait ia ki para Nongialam KSU khlem kano kano ka jingteh kyndon.Ngi dang ap ïa ka rai jong ka Sengkmie, bad ngi kum ki dkhot na ka Jaintia Hills District Unit ngi la long ban pynkhreh ban pyntyllun ïa ki shalyntem jongka jingïaleh nangne shakhmat,lada dei da kano kano ka bynta ruh” ong ka kyrwoh na u President ka KSU Ohibait Dkhar.
Na ka liang ka KSU Jaintia Hill ruh ka lah aibor ai mynsiem ia ki para nongialam kiba don hapoh patok kumjuh iaki bahaïing hasem jong ki ba ngi kum ki nongialam lada ngi hap ban iaid lyngba ki ba bun ki jingeh kiba ha rukom ruh ngi dei ki samla kiba ka la aiti naka bynta ka Ri bad ka jaitbynriew.. “Ngim dei ki riew sniew lada ngi shong hapoh patok ruh, ngi shong hapoh patok dei tang ban shu pynpyngad iaka jabieng”
Kumjuh ruh ka seng ka lah pynbna sha baroh ki Dkhot jong ka KSU Jaintia hill District baroh ki Circle ki Unit bapher2 ba kin long kiba lah khreh katba ngi dang ap ia ka Rai na ka KSU Sengkmie.
Nalorkata, la ong ruh ba ong ruh ba lada dei ba ka sorkar ka don ka jingkitkhlieh ïa u paitbah kan jin da la pyrkhat shwa kumno ban wanrah ïa ki aiñ ba khlaiñ ban ïada ïa ka jingrung kyrthlep ki mynder ym ba kan shu khohreh ban shna shwa ïa ka lynti rel. “Ka sorkar ba don jingkitkhlieh ka la dei ban pyrkhat shwa ban ïada ïaki trai ri trai muluk ym ban kdup ïa u mynder.”
Ka seng ha ka kyrwoh ka ong ba ki pynrem jur ïa ki pulit kiba la shu pharep jubor ïa ki dkhot ka seng ha kylleng ka bri u Hynñiewtrep kum ki nongleh kam bymman. “Ngi pynrem jur ïaki bor pulit ba ki la leit thwet bad pyndik ïa ki ïing ki sem bad bahaïing jongki dkhot. Ki pulit ki ju pyndik ïa ki dkhot jongka seng hynrei ngi pat ngim ju leh kumta hynrei lada ki ïaibteng kan sa poi ka por ba ngin pyrkhat da kumwei.”
Ka seng ka pynrem jur ruh ïa u Deputy Commissioner bad Superintendent of Police ka Ri Bhoi District, kumjuh ka KSU JHDU ka pynrem jur ia ka jingleh riew khlaw ki bor jong ka ain kiba thwet ban kem ia ki dkhot jong seng la kum ki riew dakaid balei kim don por ban leit thwet ban kem ia ki nongdie drug,die kynja, ki nongbat bor bad kiwei2 ki nongleh kam sniew ki ba leh ia ki kam pyrshah ia ka imlang sahlang haopoh ka jylla.
Ka Seng ka ai mynsiem ïaki dkhot jongka North Khasi Hills District bad jongka KSU hi baroh kawei bad ong ruh ba ki la pynkhreh lypa ban ïatyngkhuh ïaka sorkar bad ban ïeng skhem haka nongrim kumba ka KSU Sengkmie ka lah kren shai ba da lei lei ngim ailad iaka rel ban poi shapoh ka bri U Hynniewtrep katba ym pat don ki ain ban pynrkhing ia ki jingwan rung kynthlep ki Mynder
