Shillong,Nailur 21: Ka president jong ka seng Civil Society Women Organization (CSWO) ha kaba la synran lang ruh da ki nongioh ia ka skhim the Total Sanitation Campaign (TSC) kiba dei na ka shnong Klew kaba hap hapoh jong ka Ri Bhoi District kala ong ba kala dep ban ujor sha ki pulit jong ka Khapmara police Out post da ka ejahar pyrshah ia kito kiba la thombor ia ki paidbah.
Haba ia dei bad kane ka kong Agnes Kharshiing kala ioh ia ki kot ki sla kiba ia dei bad kitei ki skhim na u Block Development Office (BDO), jong ka Umsning, ha kaba la kdew ba u rangbah shnong ba mynshuwa ha kaba mynta u la long u sordar jong ka Raid Kyrdem u Bah Pholning Makdoh, u la ioh pdiang ka pisa kaba la kot sha ka T. 1, 47, 960 tyngka ha kaba ia dei bad ka skhim TSC kaba la mang ban shna painkhan n aka bynta ki 137 tylli ki long iing ha katei ka shnong.
Ka kong Agnes kala kynthoh ruh ia ki pulit ba kims hym la register ia ka ejahar ba kala ai pyrshah ia u tei u nongialam shnong, la ong ba lada ki pulit kim leh ei ei kan leit ban ujor sha iing bishar.
Katkum ka jingpaw kyrteng na ki 137 ki long iing kiba la lap na ka RTI, 7 tylli ki long iing kim shym ioh ia kane ka skhim bad kine ki long u Lung Lawai, Kjip Khriam u bym don shuh , Deibasshon Tangsang, Prolet Nongrum, Blassius Nongrum, Hestina Tangsang bad Drik Mukhim.
La ong ba kine kiba la ioh kyrteng ki dei tang kito kiba la wan sha khmat ban ujor leh se kin dang don shuh ruh kam lah ban ong namar ia mynta kala shim tang ia kito kiba la wan ban ujor sha khmat. La ong ruh ba don ki kyrteng kiba la rung ha kaba kim don hapoh shnong.
Na ka liang jong u Bah Salin Lawai, u rangbah shnong jong ka Upper Klew u la kynnoh ba kala don ka jingshah pynbor ba lada kim shna noh ia ki painkhana shuwa ba kin wan jurip ki briew sorkar kin shah pynduh khaw rashon. La ong ba ki don ki nongshong shnong ba kihap ban shim ram ban shna ia ki painkhana tang ban iohkhaw rashon.
Na ka liang jong ka kong Agnes kala ong ba leh se kane ka dei tang kawei ka jingjia, ioh dang don bun kiwei ki shnong kiba jia kumne, ka kyntu ia ki paidbah ba kin wan sha khmat ban ujor bad kum kaseng ka long kaba la kloi ban iarap ban rat dingkhong ia kum kineki kam leh don bor, kala ong “ wat tieng wan sha khmat ban ujor”.
