Shillong, Jylliew 16: Ha ka meit sngi palei ki briew kila lap ia u wei u samla briew ba la mynsaw bad ba la thiah ha madan surok kaba don ha lyndet jong ka Woodland Hospital Shillong, ha Dhankheti. Na ka liang jong ki pulit kila iathuh ba une u samla u la khlad noh ha katei ka meit hi bad la rah sha Civil Hospital ban leh ia kaba don kam.
Ki briew kiba iohi ia une u samla u ba la thiah mynsaw ha surok kila don kiba pyntip sha ka EMRI 108 ha kaba kila leit bran bran sha kane ka jaka ban kit ia u tei u ba mynsaw bad ha ka juh ka por ruh la pyntip sha ki pulit jong ka Laitumkrah.
Haba u SP News Agency u la ia kren bad ki bor pulit jong ka Laitumkhrah police station kila iathuh ba u tei u samla u la khlad bad la phah sha Civil Hospital ban leh ia ka postmortem, hynrei ia ka kyrteng jong u tei u samla na ka liang jong ki pulit kim pat lah ban iathuh.