Shillong, Naitung 26: The Central Bureau of Communication (CBC), Shillong, Tnat Information and Broadcasting, ka la pynlong ia ka prokram Silver Jubilee ha ka lyngkhuh dap 25 snem ka Kargil Vijay Diwas, ha Raj Bhavan, Shillong mynta ka sngi.
U Lat ka jylla Meghalaya, Phagu Chauhan u la iashim bynta ha kane ka prokram kum u kongsan ha ka jingiadonlang u GOC, 101 Area, Lieutenant General Sanjay Malik, u Additional Director General jong ka North Eastern Region (NER) Tnad NCC, Maj Gen Gagan Deep bad kiwei kiwei ki kynrem ki lyndan.
Ha ka jingai jingkren jong u, u Lat u la ban jur halor ka jinglong kyrpang ka Kargil Vijay Diwas, bad u la ong ba long kaba donkam bha ban kynmaw ia ka jinglenlade ki shipai ba shlur.
U la ong ba u sngew donbok ban ioh shim bynta ha ka jingrakhe silver jubilee bad u la ong ba kane ka dei ka sngi ban burom ia ki shipai jong ka India kiba la aiti ia la ka jingim ban iada ia ka ri. U la kren shaphang ka histori kaba riewspah jong ka India bad ki nongiakhih kiba la aiti ia la ka jingim ha ki por jong ki.
U Lat u la kren shaphang ka thma Kargil bad u la kynmaw ruh ia u Captain Keishing Clifford Nongrum uba na Meghalaya, uba la ioh ia ka khusnam Mahavir Chakra kum ka jingithuh ia ka jingaiti ia la ka jingim ha kane ka thma.
U la kynmaw kumno u Captain Nongrum u la ioh ban shimtiia u lum uba kongsanbha, ha kaba u la pyniapshibun ki shipai ba ialeh pyrshah, bad uba la duh ia la ka jingim ha kane ka kam. U la iarohruhia ka jingshlur jong ki shipai ka ri India kiba la iakhun bad jop ia ki jingiakhun ba bun ban iada ia ka ri.
Ka la don ruh ka jingai jingkren da u Geoffrey Nongrum, u para jong u Captain Keishing Clifford Nongrum. Ha ka jingkren shaphang ka jingkynmaw ia u hymmen jong u, u Geoffrey Nongrum u la ong, “Watla 25 snem ka la iaid, ngi dang kynmaw ia u Clifford.
ka sngewnguh ia ka Raj Bhavan kaba la pynlong ia kane ka prokram. Ngi don kawei ka museum kaba rit kaba pyni ia ka jingim jong u Clifford bad ngi khmih lynti ba kane kan ai mynsiem ia ki samla ba kin burom ia ka jingim bad ka jingaiti jong u ia la ka jingim.
Ka khubor jong nga ia ki sama ka dei bad ki dei ban ialeh ban don ka jingim kaba seisoh kaba wanrah burom ia ki bad ia ka ri bad ban kynmaw ia ki 527 ngut ki shipai kiba la aiti ia la ka jingim na ka bynta ka ri.
Ha kane ka sngi, u Lat u la plié paidbah ia ka jingpyni ia ki dur kaba la pynlong da ka CBC kaba pyni ia ka Kynhun Shipai jong ka India bad ki shipai kiba la aiti ia la ka jingim na ka bynta ka ri. Ka CBC ka la pyni ruh ia ka phlim lyngkot shaphang ka thma Kargil.
La pynkup burom ia ki lahduh ha ki jingiakop quiz, elocution, bad art ba la pynlong ha kane hi ka sngi da u Rahul Chaterjee, lyngba ki jingnohsynniang na u Commander Defence PRO Wing Sreeprakash J bad kiwei kiwei ki nongshah khot sngewbha ba pawkhmat. La pynkut ia ka jingialang da ka jingpynkup burom ia kiba haiing jong u Captain Nongrum da u Lat ka jylla.
U Lieutenant General Sanjay Malik, GOC 101 Area, u la kren shaphang ka jingshlur jong ki shipai ka ri ha kane ka thma, da kaba ban jur ba ka jingshlur kalong kaba kongsan ban poi sha ka jingjop.
U Major General Gagandeep, ADG NCC NER, u la ban jur ia ka jingkongsan jong kane ka sngi haba ka pynkynmaw ia ka jinglenlade kaba khraw jong ki shipai. U la ong, “Kane ka sngi ka pyni ia ka jinglenlade na ka bynta ka ri bad kalong kum ka jingkular ialade ba man ka sienjam kan nohsynniang sha ka jingkhraw jong kane ka ri. Ka rukom kaba biang eh ban pyndon burom ia ki jinglenlade jong kiba bun kalong ban bteng ka jingiaid ha ka lynti ka bym khwan myntoi ialade.”
U Dr. B.D.R. Tiwari, Commissioner & Secretary sha u Lat, u la pdiang sngewbha ia baroh ki kynrem ki lyndan bad u la kren shaphang ki bynta bapher bapher jong ka thma Kargil. U Brigadier Vijayant Mahadik, Group Commander, NCC, u la pynpaw ka jingsngewsarong ia ka jingiashim bynta ka NCC ha kane ka prokram bad u la ai ia ki kyntien ai mynsiem.
U Paritosh Dixit, News Editor jong ka AIR Shillong, u la kren shaphang ka jingkongsan jong kane ka sngi, da kaba ong, “Mynta kam dei ka sngi ban rakhe hynei ka sngi ban pynkup burom ia ki riewshlur kiba la aiti ialade na ka bynta ka ri jong ngi.” Ki la don ruh ki jingrwai ha kane prokram kaba la pynphuh pynphieng ia ka jingialang.
