Shillong, Nailar 05: U Bah Metbah Lyngdoh, MLA ka Mairang Constituency uba dei ruh u Lamphang ka Ïing Dorbar Thawain ka Jylla , da ka jingsngewkmen kaba shi katdei eh bad ji
ngsngew-sarong u la leit ban ai mynsiem ia u samla Kevinstrong Lawriniang uba don hapdeng ka jingioh jingpang COVID-19 hapdeng kane ka sngi ba u la wan ha ka kyrdan ba nyngkong eh na ka result SSLC.
U samla Kevinstrong Lawriniang lem bad ka samla Queen Annable Ann Basaiawmoit na ka St Thomas Higher Secondary School, Mairang ki la wan ha ka kyrdan ba nyngkong bad ba shiphew na ka result SSLC ba la pynbna da ka Meghalaya Board of School Education (MBOSE) ha ka sngi 05 tarik u Nailar, 2021.
U Bah Metbah u la leit shaduh jan ïing u samla Kevinstrong Lawriniang ban ai khublei bad ai mynsiem ia u ban nang iai kiew shaphrang ha ka jingpule bad ha shwa kane u MLA u la pynkup burom ruh ia ka samla Queen Annable Ann Basaiawmoit. “Ki la wan rah ka burom ia ka skul, ki kmie ki kpa bad kumjuh ia ka Mairang ha khmat ka Jylla baroh kawei”, la ong u Bah Metbah Lyngdoh.
Da kaba ai khublei ia ki samla kiba la pass bha, u la kyntu ia ki samla pule ba kin shimkhia ia ki jingpule. “Nga ïohi ia ka jingtrei shitom jong ki bad ka long ka burom kaba khraw ia ka skul St Thomas.
Ki dei ki khynnah kiba smat bad trei shitom ha ka jingpule bad ki ïoh ia ka jingkyrshan na ki nonghikai bad ki kmie ki kpa. Hapdeng ka khlam COVID-19 ki la trei shitom bad wahrah ia ka burom”, u la ong.
