Shillong, Iaiong 17: Ka tnad ka koit ka khiah haka jingialam u Secretary ka tnat u Ram Kumar kala pynlong haduh 5 sngi iaka jing leit peit leit khmih ia ki jingbit jingbiang ki jaka ai jingsumar ha ki district ba pher ba pher ka jylla naduh ka 11 haduh ka 15 tarik iaiong 2023.
Kane ka jingleit jurip ia ki jaka ai jingsumar kadei ruh ban peit la kine ki jaka sumar ki donkam ne em ban maramot ia ki jingtreikam bad ki jingbit jingbiang bad ban pynthikna ban ai iaka jingumar kaba pura ia ki paitbah ka jylla Meghalaya.
Ka tnat ka koit ka khiah ka la pynlong ka jingleit jurip ia ki jaka sumar ha East bad West Jaintia Hills, East Khasi Hills, Ribhoi, North Garo Hills and East Garo Hills, South Garo Hills, West Garo Hills bad ha South West Garo Hills.
Kane ka jingleit jong ki ka long ban tip khambha bad ban ialeh ban nang pynbha shuh shuh ka rukom ban ai jingsumar ha ka jylla bad ban dang iai pynshlur ia ki paidbah bad ban ai ruh ka jingpynshai halor ka jing ai dawai kumjuh ruh ban pynduna ia ka jingiap ki khyllung ha ka por ba kha, ha ka jing leit ban jurip ki briew ka tnad ka koit ka khiah ki la ioh ban iakren bad ki nongtrei, ki paidbah ba wan shah sumar.
Kane ka jingleit jurip kadei ruh ban sngew iaka jingeh ba ki nongsumar ki iakynduh naka por shaka por bad ha kajuh ka por ki ophisar ka tnat kila iakren ruh kumno ban pyntbit shuh shuh iaki lad jingsumar bad kumno ban pynbha iaki jaka sumar.
Ha kane ka jingleit jurip, ki ophisar ka tnat nalor ba kila iakren halor ki lad ban kyntiew bad pynbha iaki lad jingsumar kila iakren ruh kumno ban pyntrei khambha iaka iaki First Referral Units, CM-SMS, MOTHER App, ka MHIS bad kumno ban kyntiew bad ban pynbha iaki PHC, CHC nalor kiwei kiwei de.
U Secretary ka tnat ka koit ka khiah ula pynpaw ia ka jingsngewtynnad ia ka jingtrei shitom bad len lade jong ki nongtrei bad u la ai ka jingkyrkhu kyrdoh ia ki ba kin nang lah ban nang ia trei kham bha ban ai jingshakri ia ki paidbah ha ka jylla.
U la kyntu ba kin iai trei shitom shuh shuh ba kin nang kiew ka koit ka khiah bad ban pynthikna ba ki paidbah ka jylla kin ioh ia ka jingsumar ka ba bit bad kaba biang pura.
