Mawryngkneng, Kyllalyngkot 29: Ka Hill Farmer Union (HFU) sengkmie mynta ka sngi ka la leit ban pynshai paidbah halor ki mat jingdawa ba la dep phah sha ka sorkar kiba dei ki mat jingdawa kiba la mih na ka jingiakren jong ki dkhot jong ka 1stFarmer Meghalaya Parliament.
Haba kren ha kane ka jingialang ha Mawryngkneng na ka liang jong u General Secretary ka HFU Central Body, Bah Alfondbirth Kharsyntiew u la kren halor ka jingiakynduh jingeh ha ka puh ka dain, namar ka jingbym don ia ki mashin kiba biang katkum ka jingstad ka juh ba mynta ka jingbym ioh ia ki symbai, ka jingbym poi um sha ki jaka rep bad kumjuh ruh halor ka Iew ka hat.
Shuh shuh u la kdew halor ka jingremdor jong ka kit ka bah ban pynpoi ia ki mar rep sha ki jaka iew bad ka jinghiardor palat jong ki mar jong ki nongrep. U la kdew ruh halor ka jingbym ioh jingiarap haba don ka jingshah pynjulor jong ka mei mariang bad ka jingbym ioh ia ka sboh organic wat haba ka sorkar ka la khang ia ki dawai sboh.
Kumta u la iathuh ba ka HFU ka ieng ha ka nongrim ban dawa na ka sorkar ba ka dei ban pynurlong ia kitei ki jingeh kiba ki nongre ki iakynduh kaba dei ka sur jong ki nongrep lyngba ka 1st Meghalaya Farmer Parliament.
Na ka liang jong u President ka HFU bah Commander Shangpliang u la iathuh ba ka Nongrim jong ka HFU ka long ban buddien ia ki jingdawa kiba la phah sha ka sorkar bad ka jingialang mynta ka sngi ka long ba ki paidbah kin tip ia ki hok kiba ki dei ban ioh.
U la iathuh ba ki mat ba hakhmat ba ka seng ryngkat ki nongrep ki la dawa ka long ban pynbna noh ia u snem 2019 kum u snem ki nongrep (Year of the Farmer), ban wanrah noh ia ka Farmer Commission, ban pynlong ain noh i aka Agriculture Produce & Livestock marketing Promotion and Facilitation Act, 2017 kaba dei ka ain n aka bynta ka Iew ka hat.
U la iathuh ba ka seng ka dawa b aka sorkar ka dei ban pyntreikam noh i aka Agriculture Policy lane ka ain halor ka rep ka riang na ka bynta u nongrep, ka Crop Insurance lane ka insurance na ka bynta ki mar rep, ban Pyntreikam noh i aka Minimum Support price lane ban bud or ia ki mar rep bad kumjuh ruh ban map noh i aka ram jong ki nongrep.
Lada dawa ruh ban pynheh noh ia ka mang tyngka na ka bynta ki nongrep bad ban wanrah da ka ain ban pynduh noh ia ka jingot kilo ha ka jylla baroh kawei. ha kane ka sngi la iadon lang ruh ki rangbah bad ki longkmie na ki shnog bapher bapher jong ka thain Mawryngkneng.
Na ka liang jong ki piadbah ki la rai ban ai ka jingkyrshan kaba pura i aka HFU bad ki la mynjur ruh ban thaw ia ki nongkitka ha man la ki dong bad ki shnong jong ka thain khnang ban pynkhlain ia ki jingdawa ka HFU.
La ioh ruh i aka jingkren na u President jong ka HFU na Tynring, President jong ka HFU na Mawiong Sung, Bah Ribadskhem shadap bad kiwei kiwei. Ia ka jingialang la pyniaid da u Samla Hababiang Kharsohmat.
