Shillong, Nailur 28: Ki nonghikai kiba la dep ban ia leh ia ka examin ha kaba ia dei bad ki kam hikai mynta ka sngi kila leit rah da ki lama bad ki jingthoh ban pyrshah ia ka result kaba la pynmih da ka Naitional Institue of Schooling (NOIS) ha khmat ka ophis jong ka Directorate Education Research Training (DERT).
U Bah Niwell Dkhar, u la iathuh ba ha kane ka jingiakynduh bad ki ophisar jong kane ka ophis kaba don ha Shillong Laitumkhrah mynta ka sngi kila kular ba kin sa leit sha Guwhati ban ia kren bad ki bor ba dei peit ia ka NOIS ban pynbeit ia kane ka jingeh.
Na ka liang jong ka ophis kala pan por shitaiew ban leh ia kane ka bad kin sa pyntip sha ki nongialam ia ka jingmih ynda kila ia kynduh ia ki briew jong ka NOIS. Ka jingleit jong ki mynta ka sngi ban rah lama iong ha khmat ophis ka long ba ka ophis na Guwahati kala ong ba pynbeit ia ki jingbakla hapoh shiphew sngi hynrei kam shym la lah ban leh.
Kine ki nonghikai kiba la pyndep ia ka examin jong ki ha ka Diploma ha ka Elementary Edecation kila pyndep ia ka examin jong ki ha u snem 2013-2014 bad ia ka result dang pynmih mynta u snem, ha dien ba la pynslem kila don bun ki jingbakla dei halor kane ba ki nonghikai ki pyrshah.
Ki jingbakla ha ka result ba la pynmih ka long ba ki don ki nonghikai kiba la ioh mark palat ia ka full mark ki don ki nonghikai kiba la ialeh ia ka examin ki shah thoh ba ki khlem ialeh bad bun kiwei kiwei dei ia kaba ki kwah ba ka NOIS ka dei ban pynbeit.
