Shillong, Rymphang 20: ka Khasi Students’ Union (KSU) ka pynpaw ia ka jinglyngngoh, jingkyndit bad ka jingpyrshah kaba jur halor ka soskular (MOU) ba la soi hapdeng ka Uranium Corporation of India Limited (UCIL) bad ka Executive Committee (EC) jong ka Khasi Hills Autonomous District Council (KHADC) ha ka 12.01.2006 bala lam khmat da u Chief Executive Member (CEM) kato ka por u Bah Hispreaching S. Shylla.
Kumba ka seng ka la pyrshah ia kino kino ki jingthmu ban khlong ia u marpoh khyndew kata u Uranium na ka jylla naduh ki por ba mynshwa, ka seng mynta ruh ka pynsngew ia ka jingpyrshah kaba khraw halor kane ka soskular (MOU) ba la soi hapdeng ka UCIL bad ka KHADC ha u snem 2006. Ha kane ka khyllipmat kaba mynta, ka seng ka pynpaw ruh ia ka jingkyndit ha kaba ia dei bad katei ka soskular (MOU) ba la iasoi da kitei ki ar kynhun ba la kdew haneng ha kaba ka khlem shym la paw paidbah naduh kito ki por bad kane ka pyni shai ba ka don ka jingleh sop sop ka jong ka EC ka KHADC ha kato ka por kaba la ialam bakla shikatdei eh ia u ba bun balang.
Ha ki por kiba mynshwa une u rangbah ula iakhun dohiap dohim ha ryngkat ka jingiasuhbuit bad ka UCIL ban khlong ia u marpoh khyndew Uranium na West Khasi Hills da kaba pynbiej da ka surok ia ki paidbah. Katkum ka jingkam u bah HS Shylla ha kito ki por ka long ba ka jingiasoi bad ka UCIL ka long thik tang ban shna ia ka surok hynrei lyngba ka jingshem jong ka seng ha katei ka soskular (MOU) ba la soi haneng ka long ba u la ai jingbit ruh ia ka UCIL ban khlong noh ia utei u marpoh khyndew lem bad ka jingshna ia ka surok.
Kane hi ka pynpaw shai ba lyngba kane ka surok u bah HS Shylla ula ai jingbit lypa ia ka UCIL ban tih ia u Uranium na ki bynta ka thain West Khasi Hills hynrei dei halor ka jingpyrshah kaba jur jong ka seng ba kane ka jingthmu ba sniew utei u rangbah ka la pulom noh. Shuh shuh ka seng ka pynpaw ba kam don jingshaniah shuh ia une u rangbah uba kylla tdong tdong khlieh khlieh halor kane ka mat kaba ktah ia ka iap ka im ka Jaidbynriew kaba pyni shai ba um don jingkhein snep ia ka Jaidbynriew kaba rit paid.
Khatduh khatwai ka KSU ka pynpaw ba lada long katba long, jia katba jia kan iai ieng pyrshah ia kano kano ka jingthmu da mano mano ruh ban khlong ia u Uranium na kano kano ka bynta jong ka Ri Khasi baroh kawei. Kane ka long katkum ka kyrwoh kaba la phah da u president bad General Secretary ka seng KSU u Bah Lambok S. Marngar president bad u Bah Donald V Thabah General secretary ka seng.
