Shillong, Jymmang 06: Kum ki jaidbynriew Khasi, Jaintia bad Garo kiba kyrpang hapoh kane ka Ri India ka long ka jingiuhroit ia ka hok long trai lada ia ki mar poh khyndew yn hap ban shim wai na ka Meghalaya Mineral Development Corporation (MMDC), ngi sngewdei ban pynpaw ka jingpyrshah halor katei ka jingthmu, ki paidbah trai jaka kim dei ban bakla halor kane ka phang.Kumno ngin leit shim wai ia ka khyndew ka shaip lajong na ka tnad MMDC.
Ha kane ka bynta ka jingeh ka mih na Coal Mines Nationalisation Act 1973, kaba kam trai ia ki par mawiong naduh u snem 1973. Bad naduh kitei ki snem ngi dang kyndit mynta ynda la wan mih ka bor NGT.
“Ngi pynkynmaw biang ba ki paidbah kin iai tyngkhuh na ka por sha ka por ia ki Act ki Rule ki Regulation kiba mih na ki parliament namar ki Sorkar Jylla ki hap ban pyntrei ia kitei ki Central Act bad lada kim pynbeit ia kitei ki khyliap bad kylla madan ki Riti Dustur u Khasi. Halor kane ka phang Ka Sorkar Meghalaya ha ryngkat ki 60 ngut ki MLA ki la mynjur bad phah ia ka Official Resolution ban pyllait ia ka jylla Meghalaya na katei ka Coal Mines Nationalisation Act 1973, katkum ka kyndon para 12 A (b) jong ka Sixth Scheduled naduh ka 24 tarik September 2015, shuh shuh u Dr Mukul Sangma, Chief Minister, Meghalaya u la thoh sha u Dr Manmohon Singh, u PM barim bad hadien sha u Shri Narendra Modi, Prime Minister Ri India, ha ka 28 July 2014, hynrei haduh kine ki sngi ki u soh jong katei ka rai Assembly kam shym long kam.
Ka jingkylli kaba mih ka long hato lah mo ka Sorkar India ba la synshar mynta da ka BJP hato ka niew bein ia ka Official Resolution (ka rai iing dorbar jong ka Assembly).
Kine baroh ki paw ka jingdkoh (constitutional anomaly) kaba don hapoh ka Constitution Ri India namar ki Ain kiba pynjari na Delhi ki long khlem da iaid lyngba ki jingiateh ki kyndon jong ka Instrument of Accession bad ka Annexed Agreement, kaba pynlong ia ka Dorbar Ki Khlieh Nongsynshar Ka Ri Hynniretrep, ka Federation of Khasi States ban iai dawa mynta la 68 snem bad iai pynpaw lyngba ka Dorbar Ri na ka por sha ka por, pyrshah ia kiba bun ki Act, ki Rule jong ka Ri India bad ban iai dawa ia ka jingpyntreikam ka jingpynpaw ia ka Instrument of Accession and Annexed Agreement 17 August 1948, hapoh ka Constitution Ri India ha ka kyndon kaba kyrpang ka Article 370 A.
Ha ka juh ka por ka por ka dawa ia ka KHADC bad Assembly lada ki sngewdei ban iada ia u paidbah na kitei ki jingkyntur pud ki AIN kin hap ban wanrah kyrkieh ia ka Resolution ban dawa ia ka jingpynrung bad ka jingpyntreikam ia ki kyndon jong ka Instrument of Accession bad Annexed Agreement kiba la mynjur da ka Sorkar India ha ka 17 tarik Aug 1948 khnang ba ka Ri India kan tip shai ia ki Kyndon ia teh loh ka Ri Khasi Jaintia bad ka Ri India namar ngim shym soi ia ka Instrument of Merger kumba la soi ki san spah tam ki Hima Syiem kiba la pynwai bad pynduh pyndam ia lade.
