Shillongm Nailur 24: Ka kynhun jong ki khynnah pule Second Year Post Graduate jong ka tnad Pathology NEIGRIHMS kaba kynthup ia u Dr. Junali Das bad ka Dr. Devina Laishram, ka la jop ia ka Eastern Zonal Quiz in Hematology kaba la long ha Kaziranga ha ka sngi saitjian bala dep.
Kane ka jingiakop kyntip ka dei ka ba juh pynlong man la u snem da ka Indian Society of Hematology & Transfusion Medicine (ISHBT) kaba dei ka kynhun kaba nyngkong eh jong ki hematologist bad hemato-pathologist ha India.
Ka kynhun mynta kan leit iakhun ia ka jingiakop kyntip ha ka “National level” ka ban long ha Delhi kum ka kynhun ba mih khmat na ka Eastern Zone. Ka Eastern Zone ka kynthup ia baroh ki jylla jong ka Thain Shatei Lam Mihngi, West Bengal, Bihar, Jharkhand, Odissa bad Chattisgarh.
Ia kane ka jingiakop kyntip la pynlong ha ki saw bynta, College level, State level, Zonal bad National level. Kane ka dei ka sien ba nyngkong ba ki khynnah pule na NEIGRIHMS ki la jop ia ka Zonal level bad poi sha ka National level.
Ha kajuh ka jingiakop, u Dr. Junali Das u la rah ia ka khusnam best poster na ka bynta ka paper jong u, “Pure Red Cell Aplasia – Report of a Case Series.”
