Shillong, Risaw 18: Ka iing dorbar jong ka KHADC mynta ka sngi kala pdiang ia ka jingai jingmut jong u CEM u Bah PN Syiem ba kin thaw ia ka committee ba kyrpang ban peit halor ka kaiphot jong ka CAG, khnang ba ka District Council kan ialeh ban pynbeit ia ki jingkdew jong ka CAG.
Ha dien ba la pdiang da ka iing dorbar ia kane ka jingai jingmut, na ka liang jong ka Executive Committee kan sa wanrah ia kane ka jingtyrwa hapoh ka iing dorbar la shai ka sngi ban thaw noh ia kane ka committee ba kyrpang.
Kane ka Committee kaba kin thaw ka long ba kin peit bniah ia ki jingai jingmut jong ka CAG bad ia ki jingkdew jong ka ba kumno ki lah ban pynbeit ia ki jingbakla.
U Bah PT Sawkmie, haba ia shim bynta ha kane ka jingkren halor ka kaipgot jong ka CAG, u la ong ba ka long kaei kaei kaba ym lah ban pdiang ba ia ka pisa jong ka Council la thep ha ka pla jong no re jong no. U ong ba ka ophis jong ka CIB ka don ha kane ka nongbah Shillong. U la aijingmut ba ia ka pisa jong ka Council dei ban thep beit ha ka account jong ka Council.
