New Delhi, Kyllalyngkot 25: Ka Kabinet ba la ialam da u Myntri Rangbah Duh ka Ri, U Narendra Modi ha ka sngi Balang ka la mynjur ia ka jingpynkylla ia ka Article 280 jong ka Sixth Schedule jong ka riti synshar jong ka ri (Constitution).
Kaba kongsan napdeng kine ki jingpynkylla ka long ka jingpynkhlain ia ki jingdon jingem bad ka jingkhlain jong ki Autonomous District Council kiba don ha Assam, Meghalaya, Mizoram bad Tripura kaba long ka jingurlong jong ka jingangnud ki paidbah kiba sah ha kine ki jylla.
La bthah ia ka Finance Commission jong ka Sorkar Pdeng mynta ban sdang ai jingmut ban aiti shuh shuh ia ki jingdon jingem sha kine ki shiphew tylli ki ADC ryngkat bad ki bor municipal bad ki bor shnong kiba hap hapoh ki jaka Sixth Schedule.
Kane kan wanrah ka jingkylla kaba khraw namar kan kyntiew ia ka jingdon jingem jong kine ki bor pyniaid khnang ba kin ioh ban pyntrei ia ki kam pynroi bapher bapher. Kane ka jingpynkylla ka kynthup ruh ia ka kyndon ban thung ia ki State Finance Commission ha ki jylla Assam, Meghalaya, Mizoram bad Tripura.
Lyngba kane ka jingpynkylla, yn aiti ruh 30 tylli ki sobjek kaba kynthup ka Public Works Department, Forests, Public Health Engineering, Health & Family Welfare, Urban Development bad ka Food & Civil Supply sha ka Karbi Anglong Autonomous Territorial Council (KAATC) bad ka Dima Hasao Autonomous Territorial Council (DHATC) ha Assam bad kane kan pynkhlain ia kine ki ADC.
Kine ki jingpynkylla ba ka Sorkar Pdeng ka thmu ban wanrah ruh ia ka kyndon jong ka elekshon sha ki bor shnong bad ki bor municipal khnang ban wanrah ka jingsynshar ba pura sha baroh ki kyndong kynshrot jong kine ki jylla. Yn aibor ia ki bor shnong ba kin saindur ia ka jingkiew ha ka liang ka kamai ka kajih.
Da kane kan wanrah ia ka jingshongsuk kiba iadei bad ka kam rep, ka jingpynbha ia ka khyndew ka shyiap, ki jingiarap ban pynbiang um ia ki jingrep, ki kam ba iadei bad ka jingpynneh ia ki tyllong um, ki kam ri jingri, ki kam ba iadei bad ka jingwanrah ia ka bording elektrik, ki karkhana rit bad ki kam ba iadei bad ki khlaw paidbah.
Ha kine ki bor shnong bad ki bor municipal yn buh kynpang ka jaka ia ki longkmie kaba long 1/3 ha ki jaka ba hap hapoh ka Sixth Schedule ha Assam, Mizoram bad Tripura. Ha kajuh ka por yn don kumno kumno ar ngut ki longkmie hapdeng ki nominated member ha baroh ki ADC ha ki jaka ba hap hapoh ka Sixth Schedule ha ka thain Shatei Lam Mihngi khnang ban aibor shuh shuh ia ki longkmie.
Yn don ki State Election Commission na ka bynta ka jingpynlong ia ki elekshon sha ki ADC, ki bor shnong bad ki bor municipal ha Assam, Mizoram bad Tripura. Mynta shi por ym pat kynthup ia ka jylla Meghalaya ha ki kyndon ban pynlong ia ki elekshon sha ki bor shnong, ki bor municipal bad ka jingbuh kyrpang ka jaka 1/3 na ka bynta ki longkmie.
Kine ki jingpynkylla kin pynurlong ia ki jingkular ba don ha ka tripartite Memorandum of Settlements ba la soi hapdeng ka Sorkar Pdeng, ki Sorkar jong ki jylla Assam bad Meghalaya, ka United People’s Democratic Solidarity(UPDS), ka Dima Halam Daogah(DHD) bad ka Achik National Volunteers’ Council(ANVC).
Kine ki jingpynkylla ki wanrah ruh ia ka jingthmu ban pynkylla kyrteng ia ki ADC sha ka Karbi Anglong Autonomous Territorial Council (KAATC), ka Dima Hasao Autonomous Territorial Council (DHATC), ka Garo Hills Autonomous Territorial Council (GHATC), ka Khasi Hills Autonomous Territorial Council (KHATC), ka Jaintia Hills Autonomous Territorial Council (JHATC) bad ka Tripura Tribal Area Autonomous Territorial Council (TTAATC) namar ka bor jong kine ki ADC ki kham iar ban ia ki district. Yn don ruh ka jinpynkiew ia ki seat MDC ha ka KAATC, DHATC, GHATC, KHATC bad ka JHATC.
