Shillong, Jylliew 22: U Bah HS Shylla u ba la leit ban kyrshan ia ka EC jong u Bah PN Syiem mynta ka sngi u la ong ba ki paidbah kila tip shai kdar ba ka party UDP, party HSPDP bad ka seng Congress ki dei shipara ia kaba u la pyndon kam da ka ktien Hindi ‘Bhai Bhai’.
Haba kren ha ki nongthoh khubor ha dien ba la wai ka iing dorbar hapoh jong ka KHADC u la ong ba ka jingiatreilang jong ka UDP bad ka HSPDP ka long ban pyrshah ia ka seng Congress, hynrei mynta ka sngi hangne hapoh KHADC kila pynpaw paidbah ba ki ia treilang ha kaba wan rah ia ka motion bym don jingshaniah shuh ia ka u Bah PN Syiem CEM.
U Bah Shylla u la ong ba ki paidbah mynta kila sngewthuh shaikdar ia ka jinglong jong kine ki ar tylli ki seng sain pyrthei ka HSPDP bad ka UDP, namar mynta ka sngi kala paw hapoh iing dorbar ba ki ia trei lang baroh lai tylli ki party.
Kane ka jingleh jong ki tei ki ar tylli ki seng riewlum ka long ka jingiakhun ha pdeng jong u bad u Bah Ardent Basaiawmoit president jong ka HSPDP. U la ong ba mar ia jop MDC ka HSPDP kaba don sha bar na ka PDF kala leit ban kyrshan kyndit kane ka long ban khanglad ia u hynrei kim shym la lah ban leh ia kane.
