Shillong, Lber 06: U myntri ba dei peit ia ka tnad shna surok jong ka sorkar jylla u Martin M Danggo haba jubab ia ka jingkylli jong u Bah Phlastingwell Pangniang ha kaba ia dei bad ka surok na Nongstoin-Rambrai ban mih sha Kyrshai ka jylla Assam, la ong ba ia ka DPR jong kane ka surok yn pyndep hapoh jong une u bnai.
Haba jubab ia ka jingslem ban pyndep ia ka DPR na ka liang jong u myntri u la ong ba ka daw ka long ba la don ki trai jaka hapoh Kyrshai ha khappd bad ka jylla Assam kila ujor ia ka DPR kaba nyngkong kaba la pynkhreh ha u snem 2013 bad kila kwah ban pynkylla ia ka jaka bad kane kala pynlong ba hap ban leh thymmai.
Na ka liang jong ki trai jaka kila leit ban ujor sha u Deputy Commissioner jong ka West Khasi Hills bad halor kane ka jingujor na ka liang jong ka PWD kala hap ban pynkhreh thymmai ia ka DPR bad mynta u bnai kane ka DPR kan dep bad ynda la dep ka DPR ka sorkar leh ia kaba don kam.
U Bah Pangniang MLA jong ka HSPDP u la ong ba kane ka surok ka long kaba don kam haduh katta katta namar kane ka surok ka iaid lyngba ia ki 150 tylli ki shnong jong katei ka thain bad u kyntu ia ka sorkar lyngba ka tand PWD ba kan leh ei ei noh na ka bynta ka jingmyntoi jong ki paidbah ka thain.
