Shillong, Lber 09: Mynta ka sngi u myntri rangbah duh jong ka Ri India u Narendra Modi ha ka jingialang paidbah kaba la long ha Itanager ha Arunachal Pradesh u la buh bad plie ia ki skhim bapher bapher ha kane ka thain shatei lam mih ngi jong ka Ri India.
Na ka bynta ka jylla Meghalaya la buh bad plie ia ki skhim kiba la shongdor haduh T.290 klur tyngka, ha kane ka sngi u Lat ka jylla u Phagu Chauhan, u myntri rangbah ka jylla u Conrad K Sangma kila la ia shim bynta ha ka jingialang lyngba ki kor Internet.
Ki jingtei kiba la buh mawnongrim da u myntri rangbah duh jong ka Ri India mynta ka sngi na Arunachal Pradesh na ka bynta ka jylla Meghalaya ki long, ban shna ia ka surok ban iaid saw tylli ki kali ha New Shillong Township, da kba pynkylla ia ka surok kaba la don lypa ban iaid ar tylli mynta kin shna ban pynkylla sha ka ban iaid saw tylli ki kali. La buh Mawnongrim ruh ban shna ia ka IT Park ha Tura,
Ha kane ka sngi u myntri rangbah duh jong ka Ri India u la plie ruh ia ka Meghalaya Khadi Plaza Market Complex ha Barik Point, Shillong kane ka long ban kyntiew ia ka ioh ka kot jong ki briew.
Ha kane ka sngi la plie ruh ia ka Mini Football Stadium ha Dalu, West Garo Hills District; ka jaka shong jong ki heh ki hain bad ka jaka shnong jong ki paidbah ha Chondon Nokat, South West Garo Hills District; ka jaka sah ia ki nongrep kiba wan sha ka jingshah hikai ha Upper Shillong.
Ha kane ka sngi la plie ruh ia ka Child Helpline bad ka Integration bad ka ERSS 112 bad ka Capacity Development jong ka Smart Devices Forensics bad ka jingshna ia ka “Creation of Resource Centre ha North Eastern Police Forces kaba don ha Ri Bhoi District.
