Shillong, Iaiong 04: U superintendent ki police East Khasi Hills u Bah M Kharkrang u la ong ba ha dien ba kila ioh ia ka jingtip kaba bniah, na ka daw jong ka jingjur palat ka jingkhynra ia ki lehnoh ha Garo Hills, bun na ki nongialam jong ki seng lehnoh kila wan phet sha Shillong ban wan rieh tngen.
Na ka liang jong ki pulit kila bud dien bha ia kane bad ha ka miet sngi thohdieng kila leit ban khynra ia ka Grace Hotel kaba don ha khyndait lad bad na kane ka jaka la ioh ban kem ia u nongialam ka seng lehnoh ANVC(B) u Apsal M Sangma ia u ba la khot sin Dokrak, 26 na ka shnong Dobi, Baghmara lakem ia u bad la ioh ban kurup ar tylli ki mobile bad ka pisa T. 76,000/- tyngka bad ar ngut kiwei pat u James Momin, 26 na Swadrang, Tura bad Isac Marak 23 na D.C. Colony, Williamnager na ki ruh la ioh ia ka pisa bad Mobile.
Kawei ka Maruti car kaba don ha kane ka hotel kaba don ia u number ML07-A-5331 na khmat bad u number AS-01-6648 na dien la rah da ki pulit. Ha kane ka jingleit khynra la lap ruh ar ngut ki kynthei ha ka kamra jong ki ki dang ia dih kyiad bad kine ki shynrang, la ong ba kine ki dei ki thei diemet. Ki pulit ki suba ba dei u Apsal ba don kti ha ka jingsait ha Williamnagar.(SP News)