Shillong, Jylliew 01: Na ka daw ka jingkyrduh kam kaba shyrkhie ha Meghalaya, da ki phew hajar ngut ki samla ha kine ki snem kiba bun, ki la hap ban jam sha kiwei ki jylla ban pynbit pynbiang ia ka jingdon kam jong la jong bad ka jingdon kam jong ka iing ka sem. Ha kane ka thma Covid-19 la iohi ba ki samla kiba trei shabar ka jylla la jong ki la hap ban leit phai sha ka jyllatrai ka jong ki.
Ha kaba ia dei bad ka jylla Meghalaya ruh la lap ia ka juh ka jingjia, ha kaba, da ki phew hajar ngut ki samla ki la wanphai sha ka jylla trai ka jong ki, bad ki la duh ei ia ka kam ka jam kaba ki juh trei baroh shi katta, namar bun ki company shimet kin khang khyrdep lane kin pynduna ia ki nongtrei ki jong ki,namar ka jingshahktah ka ioh ka kot ha ka lockdown. Na ka jylla Meghalaya ruh bun ki bym dei ki trai jylla ki la hap ban leit phai noh sha ki jylla trai ki jong ki.
Kum ka seng ki sngewthuh ba ka jingeh kaba khraw jong ka sorkar jylla kan wan hadien ba kane ka jingialeh bad u Corona Virus kutnoh. Kumno ban pynthikna ia ka ioh ka kot kaba biang jong ki phew lakh tylli ki long iing, Kumno ban plie lad ioh kam ioh jam ia kine ki samla kiba la wanphai bad ia ki samla kiba la shong khlem kam khlem jam lupa.
Ha kaba iadei bad ka jingplie lad ia ki samla kyrduh kam, lehse, kane kadei ka kabu ia ka sorkar namar ki bym dei ki trai jylla ki la leitphai, lada ka sorkar ka don ka jingkitkhlieh ia ka lawei ki samla ka jylla, khmih lynti ba kan pynthikna ba kano kano ka kam lada dei jong ki company ne jong ka sorkar yntrei beit da ki samla trai jylla. Phewse ka long kaba sngewsih ban iohi ba ka sorkar ka rai pynban ban wan ialam nongtrei bylla da ki ba na bar jylla.
Kane kadei ka rai pyrshah ia ki samla ka jylla bad pyrshah ia ka koit ka khiah jong ki paidbah ka jylla bad kane ka pynpaw shai baka sorkar kam don ia ka jingkit khlieh na ka bynta ka bha ka miat jong ki trai jylla.
Ka party KHNAM ka ong ba lada ia u ne ka kaba napoh ka jylla la pynbor ban leit bylla shabar ka jylla bad ia kiba nabar ka jylla ka khot sngewbha ban wan bylla hapoh ka jylla, shano ka lawei jong ka jylla. Ha ki kyntien kiba shai, ki pynrem bad pyrshah jur ia kane ka rai ka sorkar bad ka seng kan ym randieh ban kit ia la ka lyngkor ha ki por ba don kam la ong u bah Thomas Passah president ka Youth Wing jong ka KHNAM.
