New Delhi, Naitung 17: Na ki 20 tylli ki khla Cheetah kiba la wanrah na South Africa bad Namibia, ki la don san tylli ki kiba la khlad jong kine ki khla kiba la heh ha Kuno National Park, Madhya Pradesh haduh mynta.
Katkum ka jingwad jingtip da ka National Tiger Conservation Authority (NTCA), kaba dei ka kynhun kaba halor tam ha kaba pyntreikam ia ka Project Cheetah, kine ki jingkhlad ki la jia namar ki daw bym lah kiar.
Ki don katto katne ki khubor kiba ong ba kine ki jingkhlad jong kine ki khla Cheetah ki dei na ki daw bapher bapher kum ki radio collar bad kiwei kiwei. Hynrei kine ki khubor ki dei ki bym don nongrim ha ka jingstad science bad ki dei kiba shu antad.
Ka Project Cheetah kan dang dap shi snem bad ka dang kloi palat ban antad ia ka jingjop jong kane ka projek namar ka jingpynroi biang ia ki khla Cheetah hangne ka dei ka projek kaba jrongsamoiu.
Ha kine ki 10 bnai ba la dep, baroh kiba iadon bynta ha kane ka projek ki la ioh ia ki jingsngewthuh kiba shongkhia ha ka jingpeit ia ka jingroi bad ka jingim jong ki khla cheetah bad ruh ka jingiada ia ki. Ka don ka jingkyrmen ba kane ka projek kan long kaba jop bad ym don daw ban shu antad ha kane ka por.
Ki don ki sienjam ban iada ia ka jingpynroi biang ia ki khla cheetah ban wad jingtip halor ka daw jong ka jingkhlad kine ki khla Cheetah, ka jingiamir jingmut bad ki riew shemphang halor ki khla cheetah, ki doctor veterinary na South Africa bad Nambia ka dang iaidshakhmat na ka por sha ka por.
Shuh shuh, ki kyndon, ki jingiada, ki jingshakri veterinary, ki jingai jinghikai bad ki jingpyntbit kiba la don lypa ki dei kiba dang peit bniah bha da ki riewshemphang na ka ri. Ka Cheetah Project Steering Committee ka dang peit janaiia ka projek bad ka la pynsngew ia ka jinghun shaphang ka jingpyntreikam haduh mynta.
Shuh shuh, ki sienjam kum ka jingseng ia ka Cheetah Research Center ha kaba ki don ki jingshakri na ka bynta ka jingpyllait im, jingkhyllie im, ka jingpynbha ia ki jingai jingshakri, ka jingsngewthuh.
Ka jingwanrah shuh shuh ki jaka khlaw hapoh ka jingpeit jong ka Kuno National Park; ka jingpynbiang shuh shuh ki nongtrei; ka jingseng ia ka Cheetah Protection Force; ka jingpynbiang ia ka jaka sah kaba ar ia ki khla cheetah ha Gandhi Sagar Wildlife Sanctuary, Madhya Pradesh ki dei kiba la pynkhreh.
Ki jingnang jingstad na kylleng ka pyrthei ha ka jingpynkynriah ia ki khla cheetah sha ki jaka sah ba thymmai Ia ki khla cheetah la wanrah biang sha India hadien ki phew snem bad kum kane ka projek, khlem pep, kan ioh mad ia ki jingeh bad ki jingjop.
Ki jingnang jingstad na kylleng ka pyrthei, khamtam na South Africa ki pyni ba ki por ba dang wanrah thymmai ia ki khla cheetah ha ki ri Africa ki la wanrah ia ka jingkhlad 50% jong ki khla cheetah ba la pynkynriah.
Kine ki jingkhlad ki lah ban jia namar ki jingialeh hapdeng ki jaitmrad, ki jingjia ba syndetshuwa bad hadien ba la pyllait ia ki ha ki jaka sah ba thymmai. Ki jingkhlad ki lah ban jia ruh namar ki jingmynsaw haba kine ki khla ki behmrad.
Ka jingsiatbeain ia ki, ka jingiatyngkhuh kali, ka jingai bih bad ka jingshah bam ha kiwei kiwei ki mradkhlaw bad kiwei kiwei ki daw. Namr kine baroh, ka rukom treikam ka la pynkhrehia ka jingpynbun biang ia ki khla cheetah ba la wanrah nyngkong man u snem.
Ka nongrim ka Sorkar India ka la sdang ia ka projek ban wanrah biang ia ki khla cheetah sha India. Ka Project Cheetah ka dei kaba la pyntreikam da ka National Tiger Conservation Authority (NTCA).
Kane ka dei ka kynhun hapoh ka tnat Environment, Forest and Climate Change (MoEF&CC) ha ka jingiatreilang bad ka tnat Forest jong ka Sorkar Madhya Pradesh, ka Wildlife Institute of India (WII) bad ki riewshemphang ha ki kam kiba iadei bad ki khla Cheetah na Namibia bad South Africa.
Ia ka jingpyntreikam ia kane ka projek la leh katkum ka ‘Action plan for Introduction in India’ bad ka Steering Committee kaba kynthup ki riewshemphang, ophisar kiba iadon bynta ha ka jingwanrah biang ia ki khla tiger ha Sariska bad Panna Tiger Reserve, kiba peit ia kane ka projek.
Hapoh ka Project Cheetah, 20 tylli ki khla Cheetah ia kiba la pyndait ia ki radio collar la wanrah na Namibia bad South Africa sha Kuno National Park, Madhya Pradesh, ha ka jingrah kaba nyngkong duh ia kine ki khla na kawei ka jaka khlaw sha kawei pat. Hadien ka por ba la buh marweiia ki, ia baroh ki khla cheetah la rah sha ki jaka set ba iahap.
Mynta 11 tylli ki khla cheetah ki dei kiba iaidlaitlan bad 5 tylli kiba kynthup ia i khun cheetah ba la kha ha India ki don ha ki jaka set ba iahap. Baroh kine ki khla cheetah kiba iaidlaitlan ki dei kiba la buddien baroh shi sngi shi miet da ka kynhun kaba peit kyrpang ia kane ka kam.
Ka Sorkar India ka la bthah ia ka kynhun kyrpang jong ki ophisar NTCA ba kan iatrei lang bad kito kiba trei ha ka Kuno National Park. Kane ka kynhun ka peit ia ki jingtip ba ioh lum da ki kynhun kiba don ha kane ka jaka khnang ban ioh ban shim ia ki rai kiba iadei bad ka koit ka khiah bad kiwei kiwei ki sienjam kiba donkam ban pynbiang na ka bynta ka jingbha jong kine ki khla cheetah.
