Shillong, Jylliew 06: Ka iew masi sha Bangladesh kala kiew dor haduh katta katta ha kaba ki nongkhaii Masi kila thep ia ki masi wat ha ki kali Maruti kumba la ioh ban kem da ki shipai BSF na Umsyiem mynta ka sngi ha khappud bad ka Bangladesh.
Na ka liang jong ki BSF haba kila iohi ba ka kali Maruti Alto kala ieng ha khappud bad ka Bangladesh kila leit ban ker kut ia ka ban peit kaei kaba la jia, haba kila phah plie ia ka jingkhang la lap pynban ba don ar tylli ki masi hapoh ka kali Maruti.
Ki Shipai BSF kila kem ia kine ki ar ngut ki briew ha kaba baroh ar ngut ki dang dei tang u khynnah namar ba u dang 17 snem bad u wei pat dang 18 snem ka rta baroh ar ngut ki dei na ka shnong Nongsdar kaba hap hapoh jong ka Pynursla Police station. Na kine la ioh kurup ka pisa India T.4380 tyngka bad ki mobile.
Ha kawei pat ka jaka ha Patharghat ki shipai BSF kila ioh ban kurup haduh 19 tylli ki masi hynrei ki shipai BSF kim shym la ioh ban kem ia ki briew namar ba kila ioh ban phet sha khlaw ha ka jingdum jong ka miet.
