Shillong, Rymphang 29: Mynta ka sngi katba ki paidbah na kylleng ki bynta jong ka Ri Khasi kila wan sha Shillong namar ki kam ki duk jong ki, ban wan siew wan tda kala mih ka jingklumar kynsan ha iewduh bad kane kala pynher syrngiew ia ki paidbah nongleit nongwan.
Ban tem ia ka jinghuri hura na ka liang jong ki bor ba dei peit ia ka District Adminstration kila pynjari noh mar dor ia ka Curfew hapoh ki ar tylli ki Police Station, ka Lumdiengjri bad Sardar PS bad kane ka korphiew kane kan neh haduh ban da pynbna da kumwei pat.
Kiba mynsaw ha kane ka jingklumar mynta ka sngi la pynkit sha Civil Hospital Shillong ban ioh ia ka jingsumar bad kiba mynsaw ki long, u Akash Ali 21 snem, u Ajay Kuri 39 snem, u Rikesh Das 60 snem, u Satya Madak 36 snem, u Deepak Kumar 17 snem, u Pradeep Kuri 21 snem, u Aman Kumar Shah 18 snem, u Jadur Choudhury 50 snem bad u Shubham Nath 18 snem.
Na ka liang jong ki pulit kila iathuh ba kine baroh kila mynsaw ha ki jingjia kylleng kylleng kiba la jia mynta ka sngi ha kane ka jingklumar ha Shillong. Ia kine kiba mynsaw baroh la kit sha Civil Hospital ban phah sumar. Ha kawei ka jingjia ha Sohra u wei u briew u la shah shoh bad mynsaw bad la pynkit ia u sha Shillong ban sumar.
Ha kane ka jingklumar ha kylleng ki bynta jong ka nongbah Shillong u wei u briew u ba la tip kyrteng u Rupchand Dewan 29 snem u ka khlad noh ha ka jingshah shoh ha ki briew kiba ym lah ban ithuh.
Haba kren ha ki lad ptathai khubor u Depak Kumar Choudhury u la iathuh ba u briew ba la wan ban pynsaw ia u don marwei bad ha dien ba la dep leh ia kane ka kam u la phet noh bak.
Katkum ka jingiathuh ki bor pulit la ong ba bun na kiba la mynsaw ki dei kiba la shah pynmynsaw ha ki riew sniew kiba ym lah ban ithuh ha ki bynta bapher bapher jong kane ka nongbah Shillong.
Na ka liang jong ka Deputy Commissioner kala iathuh katkum ka jingtip kaba kala ioh ka long ba ha ki jingjia ha ki jaka bapher bapher kila don ar ngut kiba mynsaw bad u wei u ba khlad dei na Laban.
