Shillong, Jylliew 16: U Symbut Myntri Rangbah ka jylla u bah Prestone Tynsong, ryngkat u bah Hamletson Dohliang myntri kam pynroi sor bad u bah AL Hek myntri ka koit ka khiah kila leit ban jurip ia ka Iewduh mynta ka sngi ban shem hi da lade khang ba ka sorkar kan lah ban wat lat kumno ban plie biang noh ia ka Iewdu.
Haba kren ha ki lat pathai khubor ha dien ba la dep ban jruip u bah Tynsong u la ong ba ia ka kaiphot un sa rah sha ka sokar shen kin sa ia shong ban ia kren ia kane ka kam ba kin shim ia ka rai kumno ban leh. Kane ka jingwan ka long ha dien ba la ioh ia ka jingud jingnam na ki nongiew.
Kane ka jingkhang kala long kumba lai bnai tam bad kane ka kala ktah shisha ia ka kamai ka jih. Na ka liang jong ka sorkar kala ia pyrshang hi ban plie ia kane ka iew hynrei kine ki jingjia kila jia bad la pynsangeh shuwa shipor. Na ka liang jong ka sorkar kala khot ia ka jingialang ia u CEM jong ka KHADC bad ia u Syiem.
Ha ka jingialang kaba la long mynnin ka sngi ka sorkar kala shim ia ka rai ban kin wan jngoh hi da lade ban shem ia kane ka jingshisha ia kane ka jinglap jong ki kin sa rah sha ka jingialang ban shim ia ka rai.
Lada plie ruh ka sorkar ka hap ban wat ia ki lad ki lynti kumno ban leh da kaba ia treilang ha pdeng ka KHADC bad u Syiem, kane ka Iewduh ka dei ka Iew tynrai bad ka sorkar ka kwah ban pynneh pynsah ia kane ka iew kum juh ka KHADC namar kane ka dei ka iew tynrai mynhyndai hynthai.
Ka sorkar kan shim ia ki jingai jingmut na baroh ki liang bad ka sorkar kan sa pynmih ruh ia ki jingbtah ynda ka sorkar kala shim ia ka rai. Ka jingleit jurip mynta ka sngi la sdang na Motphran ter ter sha khlieh Iewduh bad wan sha iew Mawlong.
Ha kane ka sngi la don lang u CEM jong ka KHADC u Bah Titosstarwell Chyne, ka Kong Grace Mary Kharpuri EM, u Syiem jong ka Hima Mylliem u Pa,im Ainam Syiem bad ka kynhun myntri, u MLA jong ka Shillong West Bah Mohendro Rapsang, ka Deputy Commissioner kong Matsiewdor W Nongbri,ka SP jong ka East Khasi Hills kong C Lyngwa bad bun kiwei kiwei ki ophisar.
