Shillong, Risaw 31: U bah Latham Khongsit na ka shnong Laitmawsiang kaba hap hapoh jong ka Khatarshnong Laitkroh Community bad Rural Development Block la ong ba um hun ia ka jubab jong u BDO ha kaba ia dei bad ka RTI kaba u la pan halor ki surok hapoh shnong Laitmawsiang.
Haba kren ha ki lat pathai khubor mynta ka sngi ha Shillong Press Club u bah Latham u la ong ba ka jingpan RTI jong u ia ki surok kiba la shna hapoh ka shnong Laitmawsiang kaba hap hapoh jong ka Hima Sohra ban tip katno la pynlut ha kaba thied tair bad shna ia ki surok dewbilat.
La iathuh ba ki surok bala siang da ka dewbilat hapoh ka shnong Laitmawsiang ki dong san tylli bad haba kheinlang baroh kila lot sha ka 1.80 km bad ka jubab kaba la ai da u PIO ba dei u BDO la shu ong ba ka jinglut baroh ka long T.59 lak tyngka, hynrei khlem batai kumno la pynlut ia katei ka pisa.
La ong ba la pan RTI lai sien lynter ha kaba ia dei bad ka surok ha shnong, hynrei ha jubab ka long ba la mang pisa T.33 lak tyngka shikilo meter bad na ka bynta 1.80km ka jinglut ka long T.59 lak tyngka, khlem batai kumno la pynlut ia katei ka pisa.
U bah Latham la ong ba u BDO u khlem jubab ia kaei kaba u pan hynrei la shu ai kyllum, ka jingpan RTI jong u ka long ban tip katno la thied shyiap, katno la thied mawria, katno la thied dewbilat, hynrei u BDO khlem jubab ia kata la shu ai kyllum ia kaba umhun ia ka RTI ba u la ioh.
