Mawkyrwat, Jylliew 13: Mynta ka sngi kumba saw hajar tam ki paidbah kila ia tuid sha ka shnong Mawsaw kaba hap ha South West Khasi Hills ban ia shim bynta ha ka jingiaid paidbah ban pynrem ia ka ka jingpyniap Dusmon u Tekstarly Lyngkhoi ia ka samla kaba dang 18 snem ka rta ha katei ka shnong.
Da ka mynsiem kaba sngewkhia ki paidbah na ki saw dong jong katei ka shnong kila ia tuid sha kane ka jingiaid paidbah ban pyrshah ia kane ka jingleh kam sniew jong u tei u briew u ba la nud ban shim wat ia ka jingim briew kumba la kynnoh ha kaba mynta u don ha kti jong ki pulit.
Ha dien kane ka jingiaid paidbah kala don ka jingialang haba ki la don ki nongkren na ki kynhun bapher bapher na ka tei ka thain ban pynrem ia u nongleh ia kane ka kam sniew kaba la pynsuh jer ia katei ka thain baroh kawei.
U president jong ka KSu Bah F. Nongrem u la ong ba ha kane ka jingialang la shim ia ka rai ban dawa na ka Juvenile Justice Board (JJB) ba ka dei ban phah test bha ia ka rta jong u Tekstarly Lyngkhoi namar ka seng kam ngiet ba un dang dei u khynnah banlap ia ka rta ba shisha dei ban phah test khnang ban dup lah ban pynshitom ia u katkum ka ain.
U Bah Nongrem u la ong ba ka jingong ba u dang hap hapoh ka rta jinglong khynnah ka dei kaba la kam da ki pulit, halor kane ka seng kala leit ban ia kynduh ia superintendent jong ki pulit jong ka South West Khasi Hills District ban dawa ba dei ban dap hah test ia ka rta ban lap ia ka jingshisha .
Ka KSU ka dawa ba ka preliminary assessment dei ban pynkloi noh ban lap ia ka rta ba shisha jong u tei u nongleh kam sniew , katkum ka jingtip kaba ka seng kala ioh na ki briew ka thain Mawsaw ka long ba u la tam ia ka 18 snem, dei na kane ka daw ba ka seng ka dawa ba dei ban da phah test ban lap thinka ia ka rta la ong u Bah Nongrem
Na ka liang jong ka KSU, women wing kan pynlong ia ka jingthang mombati ha ka jan miet jong ka 15 tarik mynta u bnai ha Mawkyrwat kum ka dak jong ka jingsngewlem na ka bynta katei ka khynnah kaba la ngap ha kane ka jingjia kaba sngewsih. La khot lawer ia baroh ba kin ia poi sha kane ka sngi.
