Shillong, Jylliew 23: ka kynhun jong ki nongdie madan ha ki surok jong ka sor Shillong mynta ka sngi kila leit ban ia kynduh ia ka kong Ampareen Lyngdoh ka myntri ba dei peit ia ki kam pynroi sor ban dawa na ka sorkar ba ka dei ban ai jaka ia ki ban shong die jingdie.
Haba kren sha ki nongthoh khubor ha dien ba ki ladep ban ia kynduh ia ka myntri, ka kong L Marbaniang bad u bah S Thabah haba kren ha ka kyrteng jong ki nong die madan ki la ong ba ha kane ka jingiakren ka myntri kala ong ba kin sa ia peit , lano kata ka ia peit kan urlong katba ka kpoh jong ki ka thngan.
Kine ki ar ngut kiba la kren ha ka kyrteng jong ki nongdie madan kiba la ia poi kumba 100 tam ne duna sha Additional secretariat ban pynpaw ia ka jingsngew ka jong ki kala ong ba naduh lashai ka sngi kin sdang biang namar kim lah ban im khlem da don ia ka kam ka jam.
Ka kong L Marbaniang, kala ong ba lada ki iaid dakaid ruh kin sha kdew kti lada ki trei iakane ka kam ruh ki shah pyndik ha ki briew jong ka ain, katba ka kpoh ka thgnan haba ban ka jingthngan kim ban se ban trei ia kane ka kam. Kumba ka long mynta tang ha GS Road ki don palat ia ka 250 ngut.
Ha kane ka jingiakren la ong ruh ia ka myntri ba lada ka kata ka jingshong die madan ka jong ki kala ktah ka sorkar ka dei ban ai jaka ia ki shawei tang ba ka dei ban long ka jaka kaba ia iaid ki paidbah ba ki lah ban die ia ki mar kaba ki juh die. “ Ngi sngewthuh ia ka jingkhap ngiah, hynrei shaei yn leit” la ong ka kong L Marbaniang.
U Bah S Thabah bad ka kong L Marbaniang lem bad kiwei kiba la ia don lang ha kaba kren ha ki nongthoh khubor mynta ka sngi kila ong ba ki siew T.20 tyngka ha ka shitaiew sha ka Shillong Municipal Board, kine ki briew kiba wan lum ia kane ka pisa na kine ki nong die madan ki kam ba ki dei ki briew jong ka Municipal Board, kumta ki ai.
Ha kane ka jingleit ia kynduh ia ka myntri la synranlang ka kong Angela Ryngad ka nongialam jong ka seng TUR bad kiwei kiwei dei. Ha kane ka sngi kila ai ruh ia ka dorkhas sha ka myntri halor kane ka kam bad kane ka jingshah khang ban nym die madan mynta kala long ar bnai lynter.
