Shillong, Naitung 24: Ka kynhun jong ka Synjuk Rangbah Shnong East Jaintia Hills District, ki la ia kynduh ia u Dr Mukul Sangma, Chief Minister, Meghalaya, ban ai ka dorkhas na ka liang ka Synjuk Rangbah Shnong East Jaintia Hills District, ha office treikam hapoh Secretariat, Shillong, ha ka 23 tarik July 2014. Katei ka jingiakynduh la urlong ha ka jingialam bad ka jingiadon lang ryngkat jong u Bah John F Kharshiing, Co-Chairman, Meghalaya State Planning Board, bad Chairman Ka Grand Council of Chiefs of Meghalaya, & Spokesperson, Federation of Khasi States,
Ha katei ka jingiakynduh u Bah Pdianghun Dkhar, General Secretary, ka Synjuk Rangbah Shnong East Jaintia Hills District, u la ai ia ka dorkhas ha kaba u la ong ba ki paidbah ki Rangbah Shnong ki Dolloi, ki sngewkhia ia ka mariang, hynrei ha ka juh ka por ym dei ban shu khang lut kat haduh ba ka wanrah ia ka jingeh ka jingshong syier hapoh Shnong ha thaw, katei ka dorkhas ka iadei ha ki lai bynta.
Ban ka Sorkar Jylla kan thaw lad ban weng ia kane ka jingkhang tih dewiong namar ka la ktah ia kiba bun ki nongshong shnong jong ka jylla Meghalaya, khamtam ha ki thain Jaintia Hills, West Khasi Hills bad ha Garo Hills. Kiba bun ki kmie ki kpa kiba im jah sngi na kane ka kam ki la wan ud sha ki Rangbah Shnong, ki Dolloi, ba kim lah shuh ban siew ia ki bai kot bad ka bai skul, bad kumta ki hap ban mih noh na skul, kat haduh ba ka don mynta sa ka jingshong syier namar ka jing kyrduh kamai ja kpoh, bad ba ka Sorkar Jylla kan leh shitom ban dawa na ka Sorkar India ba ka dei ban pynbeit thymmai (amend) ia ki Ain Coal Mines Nationalisation Ac 1973 & 1976, ka Mines and Minerals (Development and Regulation ) Act 1957, namar kitei ki Act ki ktah ia ka hok long trai halor ka khyndew ka shiap.
Ban thaw lad ban wanrah ia ka lynti ban iarap kamai jah kpoh ia ki hajar ngut ki paidbah kiba la shah ktah palat lyngba kane ka jingkhang ban shalan ia u dewiong, kaba la khang kyrdep khlem da plie da kiwei ki lynti bad 3. Ban thaw lad ban iakren bad ban pynsngew sha ki officer jong ki Bank ba kin nym leh donbor ban wan pyndik ia kiba la shim ram kali lane ban shuh knieh jubor ia ki kali kamai namar ki nongshim ram ki ia kynduh ia kane ka jingeh namar ka jingkhang na ka NGT.
Na ka liang u Dr Mukul Sangma, Chief Minister, Meghalaya u la ong ba ka Sorkar ka dang pynkhreh kyrkieh ia ki kyndon treikam (rule) na ka bynta ban trei kam dewiong, kiban long ki ban ithuh ia ka jinglongtrai ia ka khyndew ka shiap, hynrei ha kaba iadei bad ka jinglong trai ia ki par dewiong u la kubur ba Ka Coal Mines Nationalisation Act 1973 & 1976, ka Mines and Minerals (Development and Regulation ) Act 1957, ki ktah ia ka hok long trai halor ka khyndew ka shiap, bad ia katei ka kam ka Sorkar Jylla kan sa rah ia katei ka phang sha ka Sorkar India, namar lah ban amend ia kitei kitei ki ain ki Act ki Rule tang hapoh Parliament bad tang da ka jingmynjur jong ka Sorkar India. Kat bym pat lah ban wanrah ia katei ka amendment, ka Sorkar Jylla kan thaw ki rule kiban wanrah ia ka jingplie lad katkum ki jingbthah jong ka NGT
Halor ka jing ud ia ka jingktah ia kiba bun ngut ha ka jing kamai ban im ja kpoh. U Chief Minister u la mynjur bad u la ong ba ka Sorkar jong u ka la rai ban phah tohkit mar mar ban lum jingtip kaba bniah (impact assessment) khnang ban ioh ban pyrkhat katno ngut bad kumno yn iarap ia kito kiba ia kynduh ka jingeh bad ka jingshitom khamtam kiba duk kiba juh im kamai jah kpoh na katei ka kam dewiong, ban ioh ban pyrkhat da kiwei ki lynti katba kane ka kam ka dang don ha ka case bad ka NGT.
U la ong ba ka Sorkar kan sa shim khia bad bthah ia ki bor District ba kin khmih ia ki jingeh kiba lah ban mih hapdeng ki Bank bad ki nongtrei dewiong namar kane ka jingkhang na ka liang ka NGT. U Chief Minister u la ong ba ka Sorkar Jylla ruh ka la shem jingeh namar ka jingbym don ki ain ki rule ki kyndon trei dewiong, bad u ong ba ka jingbym shim khia naduh ki por mynshwa haduh mynta sawphew ar snem naduh ba ioh jylla ha u snem 1972 tad haduh ban da wan kane ka jingkhang da ka NGT, ka wan rah ka jingeh ia ka pateng kaba mynta. Hynrei u la ong ba mynta ka Sorkar Jylla ka dang trei shitom mynta ban thaw ia ki rule ki ban ia dei dur ban ka rukom im jong ngi.
Na ka liang u Bah John F Kharshiing, u la kyrpad ia u Chief Minister, ba ka Sorkar kan pynbna na ka por sha ka por ia ki kam kiba ka la shim bad leh kum shibynta ban pyntip ia ki paidbah ki ba ha ka jinglynga ki kwah ia ka jingpynbeit noh kloi ia kane ka jingkhang ia kane ka kam kaba ki paidbah ki la juh trei da ki spah snem. U la ong ba ka Dorbar ki Khlieh Nongsynshar ki iai buddien bad ka Sorkar India, ia ka dulir instrument of Accession and Annexed Agreement 17 August 1948, (IOA & AA) namar kat bym pat pynpaw ia kitei ka jingiateh bad ki jingkular ki dulir hapoh ka Constitution Ri India ki Khun ki Hajar jong ka bri hynniewtrep kin iai kynduh jingeh man ka por bad ki Ain jong ka Parliament.(SP News)
