Shillong, Lber 06 : Ka Seng Khasi Nongmynsong, mynta ka sngi, ka 6 tark Lber 2022, ka la lah ha kaban pynkut noh ia ka Shad Suk Mynsiem kaba shi sien snem ka jong ka, ba la pynlong ha madan Urkaliar.
Kane ka shad ainguh aidem ba-ar sngi la sdang ia ka hynnin ka sngi, ka 5 tarik, ha kaba shwa ban sdang ia kane ka shad ka kmen, ka la don shwa da ka nguh ka dem ka dwai ka phirat ha U Blei Trai Kynrad, ba un pynlong ia kane ka shad ka kmen kaba phuh ba phieng, ba suk ba kmen, khnang ba ki nongwan iashim bynta shynrang bad kynthei ryngkat u duhalia bad u nongwan khmih kai wan kai ba kin da lah shisha ban ioh ia ka kyrkhu Blei kaba dap kyrhai.
Ha ka sngi ba kut da ki spah ngut ki nongshad kynthei bad shynrang lem bad ki hep barit, ki la mih lympung ban iashim bynta ha kane ka shad ka kmen, kaba long kum ka dak ban ainguh ia U Blei Trai Kynad najrong na tbian,, ha lor ka jingkyrkhu ba u la dep ban theh sei ia u khun bynriew, ha ka snem kaba la dep.
Ha ka juh ka por, shwa ka aiom jong ka thung ka tep, ba sa shisien, u Blei Trai Kynrad, un theh sei ia u khun bynriew da ka kyrkhu kyrdoh kaba dap miar, khnang ban biang kein ka thang ka dep, ka rep ka riang, ban bit ban biang ka trei ka ktah, ka kamai ka kajih ban ioh ia ka met ka phad kaba koit ba khiah.
Ki nongshad kiba la mih lympung ki la rung ryngkat ka riam ka beit kaba pura, ha kaba kiu thei sotti ki la mih lympung ha ryngkat ka jingdeng ia ka pansngiat ba la sieh bad u lasubon, ka dak jong ka jingkit ka jong ka ha ka met ka longrynieing ia ka main long kynthei kaba dap miar ka jong ka.
Kum katta ka nongri ka nongdup nongsumar sukher, ki nongshad shynrang, ka jainboh, jainphong ka jainspong u thuia bad u shymphiah uba ki bat ha ka kti, ka dak jong ka main long rangbah , u nongri nongda nongsumar sukher, ia la ka ka iing ka sem, ka kur ka jait bad ka iit ka hima, ka shnong ka thaw.
Ha baroh ki kynta jong kane ka jingshad, man la ki nongshad shynrang bad kynthei, ki da pyniahap ia ka rukom shad ka jong ki ryngkat ki hynniew skit ne ki hynñiew sur jong ka ksiang ka tang muri, kaba da pynshong kun shong Blei bha ia katta ka shad ka kmen ka jong ki.
Ki riew pawkhmat ba la wan ban sakhi lang ia kane ka sngi ba kut jong ka shad ki kynthup ia u MP ka Shillong Parliamentry ba dei artad u President ka MPCC u ma Vincent H. Pala, u MLA ka Pynthorumkhrah ba dei artad u advicer ia u myntri rangbah ka jylla u ba Alexander Laloo Hek, u MDC ka thain u bah Pynshngian N. Syiem, u Acting Syiem ka Hima Mylliem u Pa’iem Ainam Manik Syiem, u bah Samborlang Diengdoh, u samla rangbah ban iakhun ha ka elekshon MLA ban sa long ha u snem ban wan.
Katba na ka liang ki nongialam ka Seng Khasi Kmie, la wan ban mihkhmat da ki arngut ki vice president Rgh Wanllamphang Roy Rgh O. Pyngrope, Asst Genl Secretary Rgh Paia B. Synrem, Asst. Secy Rgh Synroplang Kharshiing, , ki dkhot ka Seng Kynthei Seng Khasi Kmie, nalor katta la sakhi lang ruh da u President ka Seng Khasi Mawlai u Rgh D.L Nongbri ryngkat ki nongwan synran ia ki nongshad bad u spah ngut u nongwan khmih kai.
Ha kaba kut noh jong kane ka shad, la ioh ruh ia ka jingsam ia ki song ai sngewbha sha baroh ki nongshad shynrang bad kynthei bad ruh ia ka kyntien ai khublei ba la ai da u Rgh Skor Jala, President Seng Khasi Nongmynsong.
