Jowai, Iaiong 24: Ki nongmihkhmat na ki 13 tylli ki Seng hapoh ka jingialam u Bah M H Dkhar President ka AJYWO Central Body bad ruh u Bah S.S Niangti President jong ka KSU Khliehriat Circle, mynta ka sngi ki la ia kynduh ia u Deputy Commissioner ka East Jaintia Hills District, u Bah M.S Lhuid halor ka jingbundien halor jaka rung bad jaka mih bad ka District Task Force ki mat ki ba la ia kren teng bad ka Sorkar Meghalaya lem bad ki 13 seng na ka bynta ban tehlakam ia ka rung ka mih kyrthep bad ka shong ka sah jong ki nongwei hapoh u pud u sam jong ka jylla, khnang ba kan ym ktah ia ka ki trai ri trai muluk jong ka jylla.
“Ka long kaba sngewdiaw haduh katta katta ban tip ba ha ka jingkynduh jong ki ia u Deputy Commissioner jong ka East Jaintia Hills District, kum ba la lap ha kiwei pat ki district ha ka jylla ka juh hi, ki la lap sa ha East Jaintia Hills District ruh ha kaba ia ka District Task Force kaba dei ban thaw kat kum ka Section 5(1) jong ka Meghalaya Residents Safety and Security Act, 2016 ym pat shym la lah ban thaw satia ha katei ka district namar ka District Administration ka khlem pat ioh kano kano ka jingbthah na ka sorkar jylla ha ka jingiadei bad kane. La lap ruh ba wat tang ia ka kopy jong katei ka aiñ ruh ym pat shym la phah sha katei ka district haduh mynta” ong u Bah M H Dkhar, President ka AJYWO Central Body.
“Ha ka jingiadei pat bad ki 5 tylli ki jaka rung bad haja mih pat, ki khyrdop talasi mynder kiba dei ban buh ha East Jaintia Hills kata, ha Mooriap, Lakasein, Umkyrpong, Rata-cherra bad Malidor ka District Adminstration ka la dep ban leh tang ia ka Social Impact Assessment bad shen ka District Administration kan sa pynbna paidbah ia katei ka report bad ruh thung ia ka Expert Committee ban pule bniah bad ai jingmut biang halor jong katei ka report lada donkam shwa ban iaid sha kiwei pat ki bynta ba iadei bad ka jingpynkhreh ia kitei ki jaka rung bad jaka mih ha ka District. Ngi la kyntu ruh ia u DC ban pynsted ia ki jingpynkhreh kiba donkam baroh naka bynta kitei ki Entry & Exit Points khamtam kito kiba hap hapoh jong ka PHASE-I,” ong shuh shuh u Bah M.H Dkhar.
U Bah Dkhar u la ong shuh shuh ba ka sorkar jylla ka suki palat haduh katta katta ban pyntrei kam ia kiei kiba lah ia shong jingialang bad iakren bun bun sien ha ka jingiadei bad kitei ki mat kiba dei ban pyntrei kam noh wut wut kat kum ba lah ia rai lang na ka bynta ban tehlakam ia ka rung ka mih bad ka shong ka sah jong ki nongwei hapoh u pud u sam jong ka jylla khnang ba kan ym don jingktah ia ki trai ri trai muluk.
“Ngi da sngewkhia shisha haduh katta katta ban tip ba pleng ka Sorkar Jylla haduh mynta kam pat shym la lah ban pynurlong wat tang ia ki Entry & Exit Point ba lah pynhap ha PHASE-I haduh mynta ruh bad ba ia ka District Task Force ruh ym pat shym lah lah ban thaw ha ki district ba pher ba pher hapoh ka jylla wat hadien ka jingmynjur ia ka Meghalaya Resident Safety and Security Act, 2016 naduh u bnai September mynshem snem”, ong biang u tei u nongialam jong ka AJYWO.
“Shen ngin sa hap ban ia kynduh biang ia ka Sorkar Jylla ban ia kren biang bad ka halor kine ki mat kiba dei na ka bynta ka iap ka im jong ka Jaidbynriew rit paid trai ri trai muluk jong ngi ban pan jingshai na ka sorkar halor ka jingsuki palat ban pyntreikam ia kiei kiba ngi la ia kren bad iakut bad ka sorkar mynta la 3 snem tam” pynkut u bah M. H Dkhar.
