Shillong, Nailur 27: U myntri rangbah ka jylla mynta ka sngi u Conrad K Sangma u la wanrah ia ka “Rai Sorkar” ban phah sha ka sorkar pdeng na ka bynta ban pynrung noh ia ka ktien Khasi bad Garo ha ka khyrngit kaba phra jong ka Riti Synshar jong ka Ri India.
Ia kane ka Rai Sorkar la wanrah da u Myntri Rangbah ka jylla u Conrad K Sangma, ha kaba ka iingdorbar baroh kawei kala pdiang ia kane ka rai jong ka sorkar khlem don kano kano ka jingiapyninia la na ka liang synshar ne na ka liang pyrshah.
Kane ka Rai sorkar kaba la pdiang da ka iing dorbar mynta ka sngi ka don san sla bad ha kane ka Rai ka sorkar kala batai shai kdar ia ki nongrim kiba ka sorkar ka pynieng ba balei la wanrah ia kane ka Rai mynta ka sngi hapoh ka iing dorbar ban dawa na ka sorkar pdeng ban pynrung ia ka ktien khasi bad Garo ha ka khyrngit kaba phra jong ka RIti Synshar jong ka Ri India.
Haka jingkren jong u Myntri Rangbah haba kren hapoh ka iing dorbar haba wanrah ia kane ka Rai Sorkar ban dawa na ka sorkar pdeng ban pynrung ia ka ktien khasi bad Garo ha ka khyrngit kaba phra jong ka Riti Synshar, u la ong ba kane ka dei ka Rai kaba don kam haduh katta katta, namar ki paidbah jong ka jylla ki kwah ban iohi ba ia ka ktien Khasi bad Garo dei ban ithuh noh da ka Riti synshar jong ka Ri.
Ha ka jingkren jong u Bah PT Sawkmie, ha ba kren ai khublei ia ka sorkar kaba la wanrah ia kane ka Rai sorkar mynta ka sngi ka la long ka sngi sah kynmaw na ka bynta ki paidbah jong ka jylla baroh kawei. Ha ka juh ka por u la ong ba kane kam dei ban kut tang ha ka jylla hynrei ka dei ban poi sha ka tnad kam poh iing jong ka sorkar pdeng bad lada don kam ban ia leit baroh 60 ngut sha Delhi ban pynsngew sha ka sorkar pdeng ia kane ka jingdawa ruh ki long kiba la kloi.
Ha ka jing kren jong u Bah Himalaya Shangpliang, u la ai ka jingiaroh ia ka Khasi Author’s Society bad kum juh ia ka A.chik Literature Society ba kila ianeh ha kane ka jingialeh ka jong ki bad ka iing dorbar mynta ka sngi kala pdiang ia kane ka Rai Sorkar da kawei ka sur bad lada don kam ban pynsngew ia ka sur ban dawa ruh hap ban ia leit.
Ha ka jingkren jong u bah SK Sunn, u la ong ba ka jingieit ia la ka jong ka ktien kala paw shynna naduh u snem 1960 ha kaba ka sorkar Assam ha kato ka por ka mut ban pyntrei kam ia ka ktien Assames ha kaba ki paidbah kila pyrshah bad pynlong ban ioh ia ka jylla ha ka nam jong ka ktien. Ha ka juh ka por ruh u la kyntu ia ka sorkar ba shuwa ban phah ia kane ka Rai sorkar sha ka sorkar pdeng na ka liang jong ka sorkar jylla ka dei ban ia shong bad ki dkhot jong ka KAS bad ka ALS ban ia pynbiang bha ban lait na kano kano ka jingshah woh ha Delhi.
