Shillong, Nohprah 09: Ka Meghalaya SSA Schools Association (MSSASA) Central Body ka la raiban pdiang ia ka hukum ba la pynmih da u bah D. P. Wahlang State Mission Director SEMAM (SSA) u ba long ruh u Commissioner bad Secretary ka tnat pule puthi ka Jylla kaba iadei bad ka jingpynkiew tulop ia ki nonghikai SSA hapoh ka Jylla.
Ia kane ka rai la shim ha ka Central Executive Committee (CEC) kaba la shong mynha ka 9 tarik mynta u bnai ha Shillong. Katkum ka hukum ba la pynmih da ka Sorkar Jylla lyngba u State Mission Director ha ka 31 tarik , Risaw, 2016 ka tulop jong ki nonghikai SSA kiba la pyndep ia ki kyrdan pule katkum ka RTE Act 2009 bad katkum ki kyndon jong ka NCTE norm kata class XII bad 45 percent ha ka class XII bad kumjuh ruh kiba la pyndep ia ka D. El. Ed kan kiew na ka T. 9, 200 sha ka T. 19, 044, ia ki nonghikai Lower Primary katba ia ki nonghikai Upper Primary kan kiew na ka T. 9,900 sha ka T. 20, 493. Katba ia ki bym pat pyndep ia ki kyrdan pule katkum ka norms kan long T. 9,200 sha ka T. 13, 335 ia ki nonghikai Lower Primary bad ia kiba hikai ha ka Upper Primary kan long T. 9, 900 sha ka T. 14, 392.
U bah Aristotle C. Rymbai President ka MSSASA – Central Body ha ba iakren bad ki lad pathai khubor u iathuh ba ka Synjuk ka shim ia ka rai ban pdiang ia katei ka hukum hadien ba la dep ban pule bad bishar bniah ia ki kyndon kiba la mynjur da ka Project Approval Board (PAB) Ministry ka Human Resource Development (MHRD) ka Sorkar Pdeng kaba la long mynha ka 22 tarik u April , 2016 kumjuh ruh ka Minutes jong ka Executive Committee ka SSA State Education Mission Authority Meghalaya (SEMAM) ka Sorkar Jylla lyngba ka RTI ba la pan da ka Synjuk mynha kine ki sngi bala dep.
Katkum katei ka RTI la kdew shai kdar ba ia ka tulop jong ki nonghikai SSA kiba la pyndep ia ki kyrdan pule katkum ki kyndon ka RTE Act bad NCTE norms ka Sorkar Jylla kala pynkiew na ka T. 9, 200 sha ka T. 19, 044 ia ki Lower Primary bad na ka T. 9, 900 sha ka T. 20, 493 kaba kynthup lang bad ka DA 107 percent , katba ia ki nonghikai ki bym pat pyndep ia ki kyrdan pule jong ki kat kum ki kyndon ka RTE Act bad NCTE norms kan long ha ka dor kaba 44.95 percent ia ki nonghikai Lower Primary kaba mut T. 13, 335 bad 45. 38 percent na ka bynta ki nonghikai Upper Primay kaba mut T. 14, 392.
Shuh shuh la kdew shai ba hadien ba ki nonghikai SSA ki bym pat kot kat kum ka NCTE norms ki la pyndep ia la ki kyndan pule kumba bthah da ka NCTE norms ma ki ruh kin sa ioh kat juh ka jingsiew kata T. 19, 044ia ki Lower Primary bad T. 20, 493 ia ki Upper Primary. Ka Project Approval Board (PAB) ka la bthah ruh ia ka Sorkar Jylla ba kan bud ryntih ia kitei ki kyndon ba la kdew haneng.
Na ka liang jong ka Synjuk ka kyrpad ia ki nonghikai SSA hapoh ka Jylla ba kim dei ban shah ialam bakla ha kiwei pat ki kynhun nonghikai bad ka maham ruh ba kim dei ban iashim bynta ha kino kino ki program iakhih kumba la paw ha ki lad pathai khubor ha kine ki sngi bad lada don ki nonghikai ba iaid lait ia kane ka MSSASA – Central Body kam lah ban shim ia ka jingkitkhieh ia ka lawei jong ki.
Kumjuh ruh ka Synjuk kan sa leit ban pynshai ia kane ka bynta jong ka jingpynkiew tulop kumjuh ruh ia ka jubad ba la ioh napoh MHRD New Delhi sha baroh ki nonghikai SSA jong baroh ki District hapoh ka Jylla ha kine ki sngi ban wan namar kumba ka paw hi kane ka jingthmu jong ka Sorkar Jylla bad Sorkar Pdeng kan wanrah jingmyntoi ia ngi hi ki nonghikai SSA la shai la shi sngi.
