Shillong, Jymmang 17: U Myntri ka tnad ka koit ka khiah u bah Alexander Hek mynta ka sngi u la pdiang sngewbha ia ki ar tylli ki Ambulance kiba la ai sngewbha da ka National Highway and Infrastructure development Corporation Limited NHIDCL) ha ka jingialang kaba lyngkot ha Lawmawli.
Ha ka jingkren jong u bah Hek u la pynpaw ia ka jingsngewnguh ba ka NHIDCL kala lah ban ai ar tylli ki Ambulance bad sa 10 tylli ki ban dang poi ha kine ki sngi ban dang wan ia kaba kane kan long ka jingiarap kaba khraw ia ka jylla ha kane ka jingiakhun pyrshah ia ka khlam COVID-19.
Haka jingkren u Col Narendra Sheoran executive Director, la ong ba kane ka jingiarap kaba ka NHIDCL kala ai ka de na ka CSR jong ka kompeni bad la ong ba kila dep ban ai ia ka jingpyntip sha ka sorkar jylla ba kin ai sa 10 tylli ki Ambulance sha ka sorkar jylla.
La ong ba kine ki ar tylli ki Ambulance kiba la ai mynta ka sngi ki long ki Ambulance kiba la la biang na dong shadong namar kine kim dei ei tang kita ki Ambulance hynrei kidei kiba la pynbiang kyrpang lada don ki jingjia kiba sherkhei.
Na ka liang jong u Executive Director u la pynpaw ruh ia ka jingsngew nguh ia ka sorkar Meghalaya kaba la ai shibun ki jingkyrshah ha kaba pyntrei ai ki surok ha kane ka jylla Meghalaya.
