Shillong, Nailar 05: Mynta ka sngi ka Catholic Association Shillong kaba la ialam ia ka jingiaid paidbah ban duwai na ka bynta ka jingsuk hapoh ka jylla Manipur ha dien ka jingduwai kaba la pynlong ha madan St. Anthony’s School kala pdian ia ka rai ban phah ia ka Dorkhas sha ka President jong ka Ri India ban pynioh ia ka jingsuk ha ka jylla Manipur.
Ha ka dorkhas kaba la phah sha ka President jong ka Ri India lyngba u lat ka jylla kala pynpaw ia ka jingsngewsih kaba khraw ia ki jingjia hapoh ka jylla Manipur ha kaba khlem map shuh wat ia ka burom ijot jong ki kynthei ban leh ia ki kam bym man bad shim ia ka jingim briew.
Kumba ka long mynta ka sorkar Manipur kam shym la lah ban iaid ia ka jingim jong ki briew hapoh katei ka jylla ban pynneh pynsah ia ka jingsuk bad ban iada ia ki briew, kum kine ki jingjia yn nym lah ban shu sngap hap ban pynrem.
Kumba ka long mynta kane ka jingjia kala iaid lai bnai bad ha kane ka jingjia 50000 ngut ki briew kila long khlem iing khlem sem, 10000 tylli ki iing kila shah pynjulor, 500 tylli ki jaka mane blei kila shah pynjot bad palat spah ngut ki briew kila duh ei iala ka jingim kyntup ia ki kynthei bad ki khynnah.
Ki nongshong shnong jong ka Ri India kila pynrem ia kane ka jingjia bad ka jingleh riewkhlaw, kumba ka long ym lah shuh ban shu sngap ia kane ka jingjia bad kane kan nym jia lymda don ka jingkyrshan na ki briew kiba don ha ka bor bad kum kine ki jingjia kim dei ban don ha kane ka rib a ieit jong ngi.
Kumta la lyrpad ia ki bor ba dei peit ban ai ka jingiada kaba pura, ban iada ia ka hok long briew man briew, ban pynneh pynsah ia ka jingshong shngain ha ka ri bad ban pynioh ia ka jingbym ia shah niam bad ka jingbishar kaba khuid kaba suba.
Namar ka jingbym don shuh ka jingshong suk hapoh katei ka jylla la kyrpad ia ka President ban kan phah shuh ia ki kynhun shipai ban iada ia ki riew paidbah khamtam ki rit paid namar ki iing ki sem jong ki la shah pynjot bun kila shu rieh sha ki khlaw ki btap.
Kane ka jingjia ha Manipur ka kdew ba ka sorkar jylla kam lah shuh ban pynneh pynsah bad ban teh lamkam ia ka jingshong suk ha ka jylla, kum ki nongshong shnong jong ka Ri India dawa ban pynshitom ia ki nongpynklumar shnong. La kyntu ba ka kynhun ba dei peit ia ka hok long briew man briew jong ka sorkar pdeng bad sorkar jylla shim ia ka jingujor khlem da ap haduh ban da don ba ujor.
Kum ka kynhun ki don ka jignkyrmen ba ki bor ba halor kin nym sngap jar ia kane ka jingban beain bad kum ki nongshong shnong ki duwai na ka bynta ba ka jingsuk kan wan phai kloi sha katei ka jylla kaba mat ia ki jingeh mynta, ban pynthikna ba ka riti synshar jong ka Ri India kan pynioh ia ka jingbishar kaba khuid kaba suba banpynneh ia ka jingsuk la ka long ha kano kano ka rukom.
Khmih lynti ba kibor ba halor kin sngap ia kane ka jingiaid paidbah kaba jar jar ban duwai na ka bynta ka jingsuk hapoh ka jylla Manipur,ha ka dorkhas la soi da u bah J.A Lyngdoh kum u Presidentm bah Barnabas Nongbah kum u General Secretary, bah Ronnie Lyngdoh bad bah Richard Lyngdoh kum ki Vice President ka CAS bad ia ka jingmynjur la ai da baroh ki kynhun kiba ia shim bynta ha kane ka jingiaid paidbah.
Ha kane ka jingiaid paidbah ban duwai na ka bynta ka jingsuk hapoh ka jylla Manipur la ia shim bynta da ki nongalam seng sain pyrthei na ka BJP, Congress NPP bad kiwei kwei ki nongialam kila don lang ha kane ka sngi.
