Shillong, Iaiong 25: Ki lai seng na them Ri-bhoi ki ba kynthup ka seng Meghalaya People’s Social Organization (MPSO), ka Ribhoi Youth Organization (RBYO),ka Meghalaya People’s United Front (MPUF) hynne ka sngi kila phah da ka dorkhas sha u Myntri ka tnat bording u A.T Mondal halor ka jingbym pynbeit thikna ia ki kynta pynlip bording hapoh ka district baroh kawei.
Ha ka dorkhas ki lai seng ki la pynpaw ba ka jingot bording ha Ri-bhoi district ka long ka bym iahap namar kam shym la don ka jingpynbeit ia ki kynta, lane katno kynta shisngi bad ha kano ka por ba dei ban pynlip bording.
Kila pynpaw ba kane ka jingpynlip bording ka ba khlem pynbeit por ka ktah jur ia ki paidbah ka them Ri-bhoi khamtam ia ki samla kiba pynkhreh ia ki jingpule ha ki kyrdan ba pher ba pher.
Ki lai seng ki la dawa na u Myntri ban bthah ia ka tnat sam bording ba kan pynmih da ka jingpyntip lane ka Notice haba iadei bad ka rukom pynlip bording lane ia ki kynta bad ha kano ka por ba pynlip bording ha Ri-bhoi District baroh kawei.
