Shillong, Nailar 31: U Myntri Rangbah ka jylla u Conrad K Sangma u la pynpaw ia ka jingsngewsih kaba khraw halor ka jingkhlad noh u Pranab Mukherjee president ba rim jong ka Ri India mynta ka sngi.
Ha ka jingphah sngewlem ha ka kyrteng ki paidbah ka jylla, u Myntri Rangbah u la pynpaw ia ka jingsngewsih halor kane ka jingkhlad noh u ne u riew khraw jong ka Ri.
U president ba rim jong ka Ri India u la don ha ki kam shakti paidbah bun bun snem bad u la ai ka jingshakri ia ki paidbah da ka jinglen lade bad jingsngewrit.
Ha ka jinglong nongmih khmat paidbah u la bat bun ki kam, ha u snem 2004 haduh 2006 u la bat kum u Myntri iada ri, 2006 haduh 2009 kum u Myntri korbar ri, 2009 haduh 2012 kum u Myntri pla pisa.
Ha ka 25th Naitung 2012 u la shah jied kum u president ba 13 jong ka Ri India, namar u long shisha u riew khraw u la shah pynkup burom daka khusnam ba halor duh ia ki riew paidbah ka “Bharat Ratna 2019”.
U Myntri Rangbah u la ong ba ka jingkhlad jong u president barim ka long ka jingduh kaba khraw, ha kane ka jingkhlad u phah ia ka khubor sngewlem sha ki khun ki kti bad kiba ha iing ha sem.
U Myntri Rangbah u la ong ba na ka liang ka iing ka sem ki don ka jingiajan bad u president barim ka Ri India, u Myntri Rangbah u duwai ba ai ka mynsien bala khlad kan ioh ia ka jingjah thait bym juhkud.
