Shillong, Nailur 16: U myntri rangbah jong ka jylla u Dr Mukul Sangma, haba jubab halor ka jingkylli jong u Bah Ardent M Basaiawmoit MLA jong ka seng HSPDP, ia ka jingwan shna iing jong ka Brahmaputra Realtor Private Limited ha poh u pud u sam jong ka jylla Meghalaya, u la ong ba ka sorkar kala bthah ia u Deputy Commissioner jong ka Ri Bhoi District ban tohkit ia kane ka kam.
Haba ia dei bad kane n aka liang jong ka Meghalaya Urban Development Authority (MUDA) kala ai da ka jingthoh ba ka jingtei ia katei ka iing kaba 14 mala dei ban sangeh noh bad la bthah b aka dei ban pan jingbit na ka MUDU katkum ki kyndon jong ka ain shna iing.
Kane ka jaka ba la shna ia kane ka iing ka hap hapoh jong ka Riad Marwet, ha Khanapara, kane ka jingtohkit ha kaba ia dei bad kane kam dei tang ia katei ka kompeni kaba wan shna ia kane ka iing bun mala hynrei ka long ruh ia ki ophisar.
Haba jubab ia ka jingkylli bynrap jong u Bah Ardent , hato kane kam long pyrshah ia ka ain ‘ Meghalaya Land Transfer Act’ na ka liang jong u Myntri rangbah u la ong ba da ka jingphah pan jingbit kin sa lap ia ki jingshisha baqroh namar haba pan jingbit ki hap ban suh lang ia ki kot mano ba long trai ia ka jaka.
