Shillong, 
Jymmang 12: Mynta ka sngi u Marcus CH Sangma 26 snem ka rta u dkhot ba snar jong ka seng GNLA u la wan ban pyndem ia la de ha khmat jong u Sankatha Prasad Commandant 20 Bn jong ki BSF ha Tura.
Une u dkhot jong ka seng GNLA u ba la wan pyndem mynta ka sngi la sin ruh ia u kum u Alias Dotling, u dei na ka shnong Telekhali kaba hap hapoh jong ka South Garo Hills District bad u la rung sha ka seng lehnoh ha u snem 2012 hapoh jong ka seng ANVC(B).
Ha dien ba u la rung sha kane ka seng lehnoh la phah ia u sha Bangladesh ban u la shah hikai kumno ban pyndon kam ia ki suloi kum ka AK-47 bad kit air pynbethei bom. Ha dien ba ka pyndam noh ia ka seng ANVC(B) ha u snem 2014 u la ia kynduh ia u dkhot jong ka seng GNLA u Bade Ch Marak ha kaba u la khot ia u sha ka seng GNLA ha u snem 2015.
Ka kam kaba u Marcus u la trei na ka bynta ka seng GNLA ka long ban pynrung pynmih ia ki lehnoh jong ka seng na India sha Bangladesh kane ka long katkum ka jingphla ka jong u sha ki BSF mynta ka sngi. La ong ba ia ki jain ki nep jong ki lehnoh ba ki riam la wanrah bad ai sha ki ha ka khlaw Telikhali.
La iathuh ba ha kine ki snem u la don ka jingiadei bad ki seng lehnoh kiba na ka Ri Bangladesh kaba la tip kum ka Special Bangla Tiger Force bad bun ki runar kiba ia khaii ia ki mar beain na kane ka Ri sha Bangladesh.
