Shillong 10 Iaiong: U MDC ka Mawlai u Bah Process T Sawkmie u la plie pyrda ia ka inter-skul ha shnong Umsaw ha kane ka sngi Nyngkong.Ha kane ka tamasa la don lai tylli ki skul ba iashim bynta kynthup ka DCLP skul ka Balang Katholik, Umsaw UP skul ba pyniaid ka shnong bad ka Umsaw LP Skul Presbyterian.
Ha ka jingkren lyngkot ha kane ka tamasa jong ki khynnah rit,jong kine ki skul ha shnong Umsaw,Mawlai, u Bah Sawkmie u la ong ba ka shnong shnong ka long kaba shongshit bad kaba shngain namar ka jingdon shibun ki skul.
“Lada ym don skul, ka shnong ka long kum ka khlaw, kam don ka jingshongshit bad ka jingkmen”, la ong u Bah Sawkmie uba bynrap, ba kane ka long syriem ia ka iing kaba khlem don ki khun ki kti, ka kynjah lada don tang ki kmie ki kpa.
U la bynrap ba ka jingnang jingstad ka long kaba donkam palat bad ha kane ka por lei khlem jingnang jingstad ka long kaba eh ban kiew ha ka jingim. “Ki kmie ki kpa, ki dei ban kitkhia ban phah skul ia la ki khun ki kti” la ong u Bah Process.
Ha kane ka sngi, la pynlong shwa ia ka jingiaid march pass da ki khynnah jong kine ki skul, bad hadien ba la pynher lama da u Bah Sawkmie.
La don lang ha kane ka sngi ki nonghikai skul, ki kmie ki kpa bad ki nongkitkam ka shnong kynthup u rangbah shnong Bah E Rynjah bad kiwei.(SP News)
