Nongpoh, Ïaïong 04: Saw tylli ki dukan ha Umsning ki la shah prong bad shah tuh ia ki jingdon jingem jong ki bad ki suba nongtuh hadien ba ki la dep leh ia katei ka kam ki la phet krad noh bad ym shym la lah ban tip ki dei kiei.
Ki pulit, ki la iathuh ba kane ka jingjia ka dei ha ka por kumba 1 baje shiteng synñia jong ka 3 tarik mynta u bnai, ki dukan kiba la shah prong bad shah tuh ki dei jong u Bah
Rocky Marweiñ, uba long u Rangbah Shnong ka Umsning proper ‘B’ bad laitylli kiwei pat ki dukan kiba don ha ka shnong Umsning proper ‘B’ bad kiba don syndah ka surok bah.
Ha ka jingtohkit ki pulit, la ong ba kaei kaba pynlyngngoh ka long ba wat la ki tei ki nongtuh ki la nud ban prong ia kitei kidukan, kim shym la shim satia ia ki mar ki mata ne ki mardie jong ki dukan, hynrei ki la shim pynban tang ia ka pisa, ha kaba na ka dukan uBah Rocky Marweiñ ka pisa kaba la shah tuh ka la kot sha ka T.7 hajar bad ha kiwei kiwei ki dukan.
Kine ki dukan ki la shah prong bad shahtuh ki pulit ki la iathuh ba ki trai dukan ki la tip tang ha ka sngi kaba bud ynda ki la leit ban plie ia ki ha kaba ki lap ba ka pisa kam don shuh ha ki jaka buh.
Ki pulit jong ka Umsning Out Post ha kaba iadei bad kane kajingjia mynta ki dang wad ia ki runar nongtuh kiba la donkti ha katei ka kam runar.(SP News)
