Shillong, Jylliew 11: U myntri rangbah ka jylla u Dr Mukul Sangma haba jubab ia ka jingkylli jong u bah Paul Lyngdoh kaba ia dei bad ka jingduh jong ki Street Light ha kane ka nongbah Shillong, na ka liang jong u myntri rangbah u la ong, ka jingduh jong ki street light ha kane ka nongbah Shillong baroh kila poi haduh 615 tylli.
Ban pynbiang ia ki street light ha kane ka nongbah Shillong, na ka liang jong u myntri rangbah u la ong ba ka sorkar mynta kala pyntrei kam ia ka Green Shillong City Project ha kaba ia ki street light yn buh noh da ki solar light. La ong ba kum ka jingsdang ia kane ka project ha Shillong yn buh 300 point bad ha Tura 78 points.
U myntri rangbah u la ong ba kane kan pynduna ruh ia ka jingpyndon kam ia ka light bad ia ka light kaba tam na kane ym pynbiang ia ki paidbah. Ka sorkar kala shim khia na ka bynta kane.
U myntri ka tand ka koit ka khiah u Bah AL Hek Haba jubab ia kawei pat ka jingkylli jong u Bah Paul Lyngdoh, ha kaba ia dei bad ka Entrance Test na ka bynta ban pule MBBS, u la ong kane ka dei ka jingbtah jong ka sorkar pdeng ha kaba ki jylla ki hap ban bud.
Haba ia dei bad ka committee, na ka liang jong u myntri u la ong ba u principal Secretary jong ka tand ka koit ka khiah u long u Chairman jong ka Committee ha kaba kiwei ki dkhot ruh ki ia don lang.
Na ka liang jong u Bah Paul u la dawa na ka sorkar ba dei ban don ia ka committee kaba laitluid ha kaba ka sorkar kam dei ban buh ia ki briew jong ka kum ki dkhot jong kane ka committee. Na ka liang jong u myntri u la ong ba kane ka committee kan peit ia ka jingiaid beit iaid ryntih jong ka Entrance Test.(SP News)
