Tura, Jylliew 29: U myntri rangbah ka jylla u Dr Mukul Sangma mynta ka sngi u la pynbna paidbah ha ka jingialang kaba la long ha Dikki-Bandi Stadium, Tura ba ka sorkar kan ai shilak tyngka ia ki VECs kiba la lah ban pyndep ia ki jingtrei 80 percent khnang ba kin pyndep ia ki jingtrei ba la trei hapoh jong ka skhim MGNREGA bad u la kyntu ia ki VECs ba kin trei ia ki kam kiba lah ban pynioh nong ia ki shnong ki thaw.
U Myntri rangbah u la ong ba ka long kaba jop ha kaba pyntrei ia ka skhim bylla shispah sngi ha kane ka jylla na ka liang jong ka sorkar ruh mynta kala pynkhreh ban pynkiew ia ka jingmang pisa na ka 1 pc kaba mynta sha ka 2 pc bad kam dei ban palat ia ka T.20,000.00/-. Haba ia dei bad ka pisa jong ki nongtrei sngi ka sorkar kala buh ia ka bhah pisa kaba kyrpang ba lada ka sorkar pdeng ka pynslem ban siew ka sorkar kan dang sei na kane ka bhah.
U myntri rangbah u la ban jur ia ki VEC ba kid ei ban ia leh katba lah ban pynioh ia ka jingtrei kaba 100%. La ong ruh ba ha kine ki san snem ban wan ka sorkar kan ai jingiarap ia ki nongkyndong ha kaba ri jingri haduh 40% ki long iing. Ha kane ka sngi u myntri rangbah u la sam ruh ia ki khusnam sha ki nongsam khaw rashon kiba la kyntiew ia kaba pyntrei kam ia ka National Food Security Act.
Ha ka jingren jong u , Commissioner & Secretary, P.Sampath Kumar u la ong ba kane ka jingtrei lyngba kane ka skhim bylla shispah sngi kala kyntiew ia ka rai ka por bad ka sorkar mynta ka don ka jingthmu ban shna ia ki 7000 tylli ki tyllong ha ka jylla baroh kawei. Kiwei kiba la ia don lang ki long u DC jong ka West Garo Hills u Pravin Bakshi, u DC jong ka South West Garo Hills u CVD Diengdoh bad kiwei kiwei ki heh sorkar. Na ka liang jong ki VEC kiba la ia poi sha kane ka jingialang paidbah ki long kumba 3000 tylli na baroh kawei ka Garo Hills.
