Shillong, Nohprah 22: Mynta ka sngi u bah Highlander Kharmalki kyrtong ka party Congress bala ia khun na Mawryngkeng ha u snem 2018 bad ki nongbud jong u mynta ka sngi la pyniasoh noh bad ka party BJP ha ka jingialang kaba la long ha ophis ka seng ha Bivar Road.
Ha kane ka sngi u bah Wossaroi Rani na Mawphlang bad ki nongkyrshan jong u ruh kila pyniasoh bad ka party BJP, ia ki baroh la pdiang sha ka seng da u President ka seng u bah Ernest Mawrie bad la ong ba kane ka jingwan jong ki ka long ban tei ia ka jylla Meghalaya.
Kitei kiba pyniasoh sha ka party kila pynpaw ba ka jingpyniasoh ka jong ki sha ka party ka dei na ka bynta ki kam pynroi kiba u myntri rangbah duh jong ka Ri India u Narendra Moidi u ba la trei ban wanrah ia ka roi ka par ha ka ri bad ka jylla baroh kawei.
U bah Ernest u la pynrem jur ia u nongialam ka TMC u Kriti Azad uba la kren tohmet pyrshah ia ka riti dustur jong ka jaidbynriew khasi ka jingkren ka paw ba ki nongialam ka TMC kim sngewthuh ia ka riti dustur ka jaidbynriew, la ong ba ki nongialam kiba pyniasoh sha ka TMC ki dei ban da bishar bha.
