Shillong, Jymmang 19: U Sordar jong ka shnong Mawamram u bah Sherborlang L Mawlong, ha ka jingiadon lang u sordar ka shnong Sohphoh Pyrton, u sordar ka shnong Kyllang-Jasap, u la ong ba ka Hima Lyngdoh Sohiong kala lah ban pynioh ia u pud u sam ba pura ha pdeng kine ki lai tylli ki shnong, ka shnong Mawmaram, shnong Kyllang-Jasap bad ka shnong Sohphoh Pyrton.
Da kane ka jinglah jong ka hima ban pynbeit ia u pud u sam ha pdeng kine ki lai tylli ki shnong kiba la don ha pdeng ka jingiakynad ha pdeng jong ki naduh ki snem 1987 da kaba ai sanod pathar u Lyngdoh ha katei ka por kala buh ia ki paidbah nongshong shnong ha ka jingeh kaba khraw.
Hynrei da ka jingtrei shitom jong u Lyngdoh ba mynta jong ka Hima, ha ryngkat ka jingshim khia jong u MDC ba mynta bad ka jingshim khia jong u CEM jong ka KHADC U Bah PN Syiem la lah ban pynbeit ia kine ki jingeh kiba la neh mynta la bun bun snem.
Dei ha ka 6 tarik mynta u bnai la lah ban pynlong ia ka election ban jied ia u sordar ba thymmai jong ka shnong Sohphoh Pyrton bad ha ka 12 tarik mynta u bnai la ai ia ka sand bad da kane ka jinglah jong ka hima ban shim khia ban pynbeit ia kane ka jingeh kine ki lai tylli ki shnong mynta kila poi sha ka jingiasuk ia sain.
Ka shnong Mawmaram ka don kumba 200 tnum ing, ka shnong Kyllang Jasap ka don kumba 70 tnum iing bad ka shnong Sohphoh Pyrton ka don kumba 80 tnum iing katkum kane ka jingai pud ba thymmai mynta da ka Hima.
Ha ka juh ka por na ka liang jong ki lai ngut ki sordar, kiba la don lang mynta ka sngi ha Shillong Press Club haba kren ha ki lad pathai khubor ki la pynsngew na ka liang jong ki buh ka jingmaham ba lada don mano mano ba pyndon kam bakla ia ka muhor ktei ki lai tylli ki shnong kin nym shim ia ka jingkit khlieh bad na ka liang jong ki tnad sorkar ruh kim dei ban pdiang klumar ia kino kino ki jingthoh kiba ia dei bad ki paidbah nongshong.
