Nongpoh, Ïaïong 05: Ka United Democratic Party (UDP), Ri-Bhoi district
mynta ka sngi ka la pynpaw ia ka jingbitar lep halor ka jingmih khubor
ba u Bah F.M.Mawphniang, joint secretary jong ka u la iehnoh syndet ia
ka kam ba u bat, da kaba aidaw ba u don ia ka jingthmu ban kyrshan ia
u Dr PBM Basaiawmoit, kyrtong MP shimet uba la pynieng da ka Common
People’s Front (CPF) na ka 1 Shillong Parliamentary Constituency.
U Bah Rayonald Kharkamni, working president ka United Democratic Party(UDP), Youth Wing jong ka district, haba kren mynta ka janmiet bad unongthoh khubor, u la kynnoh ba kane ka jingleh jong u Bah Mawphniang,
uba long u MDC barim ka Umroi, ka long tang ka jingaidaw, hynrei ka
daw ba sha lyndet hi ka long ba u la shah thied ha ka bor jong ka pisa.
U la ong ruh ba ka UDP ha baroh kawei ka district, ka pynpaw ba kane
ka jingiehnoh kam utei u heh ka UDP uba don ia ka jingshaniah baroh
shi katta ka dei tang ka buit ban pynbiej sha ki paidbah ha kaba paw,
hynrei kaba rieh ka don beit kaei kaei kaba la pynlong ia u ban iehnoh
ia katei ka shuki kum u nongialam ka party.
Ha kaba iadei bad kane ka jingiehnoh kam na ka liang ka UDP mynta ka la pynkhreh ban ujor ia kane ka kam sha u chief electoral officer ka jylla, ha kaba mynta ka sngi katei ka jingujor na ka liang ka Party kan leit ai sha utei u heh ki kam elekshon ka jylla bad kumjuh ruh ka Party ka la pynkhreh shaid shaid ban mudui ruh ki bor ka Election Commission ka Ri India.(SP News)
