Pynkhuid lum Jingthang ka Seng Khasi Kmie Mawkhar ha Jaiaw

Shillong, Iaiong 27: Ka Lum Jingthang Committee ka Seng Khasi Kmie ryngkat u paid byllien, ki la mih paidbah mynta ka sngi ka 27 tarik u nai Ïaiong 2025, ban pynlong ïa ka jingpynkhuid ïa u Lum Jingthang Briew ba don ha ka shnong Jaiaw, Laitdom, Shillong.
Ha kane ka jingpynkhuid la wan ban ïa mih paidbah lang ruh da ki paid jong ka Seiñ Raij Niamtre Shillong, ha kaba la pynlong ïa ka jingprat ia ki niut, ka sar ka pynkhuid bad sait ruh da ka um, ïa ki kor shongthait, ki maw sah nam kiba la tei ha ka nam ka kyrteng jong ki para riew seng kiba la Bam Kwai Sha Dwar jong u Blei ba don ha baroh ki sawdong ki sawkun jong une u lum ba pyndep ïa ka leh niam khatduh ïa ki para kur ki para kha ynda haba ki la khlad ka mynsiem ksiar ka jong ki na kane ka sla jong ka pyrthei.
Kongsan uba la wan ha kane ka sngi, dei Syiem ka Hima Khyrim Pa’iem (Dr) Balajied S Syiem bad ïa don lang u MLA Ka North Shillong Constituency bah Adelbert Nongrum, President bad Secretary Seng Khasi Kmie Rgh O. Pyngrope bad H. Marbaniang, President ka Seng Khihlang Rgh H.R Kurbah, Secretary ka Sengbah Ki nongshat Nongkheiñ Rgh Ionis Rani, ki nongïalam ka Seiñ Raij Niamtre Shillong, ki dkhot ka Jylli Pyrkhat Kam Seng Khasi Kmie, Seng Kynthei bad ki parakur ki parakha.
Shwa ban sdang ka jingpynkhuid, ka la don shwa ka jingkyntiew ïa ka lama jong ka seng da u Rgh O. Pyngrope, President Seng Khasi Kmie, hadien kane la pynbud ïa ka jingpynkup burom ïa u kongsan.
Hadien kane, u Riew Tymmen Riew San jong ka Lum Jingthang Committee u Rgh Skor Jala, u la shim pat ïa ka bynta ban leit sha ka nguh ka dem, ka shat ka kheiñ ka khnong ka bishar.
Ynda haba la dep ka nguh ka dem, ka la don pat sa ka jingai burom ia ki para riew seng bad ba sdang pat ka jingpynkhuid paidbah ïa ka sawdong ka sawkun jong u lum jingthang.
Ha ka jingkren kum u kongsan na ka liang Pa’iem (Dr.) Balajied Sing Syiem, Syiem ka Hima Khyrim, u pynpaw ba ka long ka burom haba u Blei Trai Kynrad u la sngew la sngap lyngba ki dak ki shin ha ka jingpyndep u rangbah nong nguh nongdem, kumta u sngew ban ong ban phai sha u Kynrad na ka bynta kiei kiei kiba bha kiba u la ai ïa ka Seng Khasi Kmie ban pynïaid shakhmat ha kiba bun ki rukom.
U Pa’iem u la ong ruh ba ka jingpynkhuid ïa une u lum jingthang ruh ka long ka nguh ka dem ha u Blei Trai Kynrad bad kumjuh ïa ki nongseng ki nongbuh, kaba la ïar mynta ha kylleng jong ka ri, kaban sah ban neh ka riti ka dustur ka tem ka put ka shad ka kmen ban long ka jaidbynriew kaba kyrpang.
Ha kum kane ka sngi, ka jingkynmaw kam long ruh tang ia kiba im ne kiba dang ïa don, hynrei la kynmmaw ruh ïa ki longshwa ki manshwa ki jong ngi, kiba wat la kim don shuh, hynrei ki la noh synñiang na ka bynta kane ka jaka kaba la I don burom haba ïa nujor bad kiwei pat ki jaka.