Shillong, Iaiong 11: U Bah Honsen Lyngdoh u wei na ki riew rangbah u ba la paw ha ka jylla ha ka trei ka ktah ha ki kam la jong, mynta ka sngi u la pynlait paidbah ia ka kot lyngkdop jong ka seng FKJGP ia kaba la ai kyrteng ka “Thong sha ka ioh ka kot bad ka imlang sah lang” ha Dinam Hall Jaiaw pdeng.
Ka jingthmu jong ka seng FKJGP da kaba pynlait paidbah ia kane ka kot ka long ban kyrsiew thiah ia ka jaid bynriew ha kaba ia dei bad ka trei ka ktah ka kam ka jam, la ka long ha ka kano kano ka bynta, kum ka seng ka iohi ba ki dang don bun ki kam kiba kum ka jaidbyriew kam treh ban trei, ha kaba la wan ban shim ia kine ki kam da kiwei pat ki briew ki ba na bar.
Ban pynsngewthuh ia ki paidbah ha kaba ia dei bad ka kam ka jam, ka seng kala shim nuksa ia ka jingkieng diengjri, ban ioh ia ka jingkieng diengjri ka shim por hynrei da ka jingiaiminot ka poi sha ka thong bad ban poi sha ka thong don kam ia ka jingtrei shitom.
Haba phai sha ka imlang sah lang ka jingbym ioh kam ioh jam ka ktah ruh ia ka imlang sah lang, ka wan rah ia ka jingbym ia sngewthuh jingmut ha iing ha sem bad kiba bun na ki kam sniew ha ka imlang sah lang ki mih na kine ki samla ba khlem kam bad kane ka dei na ka daw jong ka jingsangeh shiteng por ha ka jingpule bad ka daw tynrai ka dei ka jingduk ha kaba ym lah ban pyndep ia ka jingpule la ong u Bah Emlang Lytan president ba rim jong ka seng.
U Professor Hambok Syiemlieh khlieh jong ka Geography Department hapoh jong ka skul bah jong ka NEHU, u la ong ba “ Ngi dei ban kylla katkum ka jingkylla jong ka por” u la ong ka kam ka bun don kam ia ka jingtrei shitom bad kumno ban pynmih kam da lade ia lade, kane ka jylla ka don kyrkhai ka spah mariang kiba long ki kynja dawai bad kum juh ki jaka kiba lah ban khring ia ki nongjngoh kai pyrthei.
Ia ka jingmut jong ka seng kaba la pynlait paidbah ia kane ka kot la batai da u Bah Dundee C Khongsit Genenral Secretary jong ka seng, lakren ruh u president ka seng u Bah Wellbird Rani bad u Bah Honsen Lyngdoh u ba long u kongsan ha kane ka sngi. Ka rai kaba ka seng ka pynsngew na ka jingikynduh lang mynta ka sngi ka long ba kum ka seng kan long ka nongprat lynti ia kiba kwah ban seng ia la ki jong ki kam ki jam.
