Shillong, Jylliew 20: U Bah Hedrian Lyngdoh Executive Member ba dei peit iaki marpoh khyndew hapoh jong ka Khasi Hills Autonomous District Council haba jubab ia ka jingkylli jong ka kong T S Thangkhiew na Mylliem u la ong ba ka ophis kam pat ai ia ka No Objection Certificate ban shan ia ka surok ha Mawthabah.
Halor ka jong kane ka Executive Committee kala thaw ia ka committee ban bihsar bniah ia kane ka kam ban lap ia ki jingshisha baroh ha shuwa ban shim ia ka rai halor ka jingpan NOC ban shna ia kane ka surok. Ka committee kala ioh pdiang ia ki jingthoh na ki seng bhalang bad na ki rangbah shnong katei ka thain, bad na kine ki jingthoh ki paw ba don kiba pdiang bad don kiba pyrshah.
Na ka liang jong ka Executive Committee kala pynjlan shuh ia ka por jong kane ka committee sa 45 sngi ban dang peit bniah shuh shuh ia kane ka kam, la iathuh ba ka committee kala pan jingpynshai na ka sorkar pdeng ha kaba ia dei bad kane ka surok hynrei haduh mynta kim pat ioh ia ka jubab.
La iathuh haduh ka iing dorbar ba lada kane ka surok kam dei na ka bynta ban tih Uranium ki ba bun ba lang ki kwah ban sdang noh ia ka jingtrei, namar ba haduh mynta ym pat ioh ia ka jingshai kane ka surok ka dei na ka bynta kaei.
Ka kong TS Thangkhiew kala kwah ong hato ka long ne em ban pynkylla ia ka jingiaid jong kane ka surok da kaba kiar na ka tei ka jaka ba don uranium, lada duh kan long ka jingduh ia ki skhim pynroi, na ka liangjong u Bah Adelbert Nongrum MDC na Jaiaw u la ong ba katei ka surok ka long kaba sniew sha ba palat.
